Poshan Maah-a chet ṭhat lawm

Serchhip district-in kumin Rashtriya Poshan Maah (National Nutrition Month) hma chhunga hma la ṭha ber ‘Best Performing District’ lawmman pahnihna a dawn chu nimin khan Serchhip Sub-Hqrs. YMA hall-ah lawm a ni a, bawrhsap Paul L Khuma'n a hmanpui.

Bawrhsap chuan, Serchhip district tan theihtawp chhuah zel tur leh nu leh naupang ten hma lam hun êng zawk an neih zel theih nan ṭan la turin thawktute a chah a, "Nute pawimawhna kan hriat reng a ngai a, chumi rual chuan nute pawhin an pawimawhna an hriat a ṭul," a ti.

Serchhip DC hian Beti Bachao, Beti Padhao hnuaia Women and Child Development department-in sikul an enkawl (adopt) Serchhip High School zirlaite tan 'promise ring' a sem a; zirlaite chu ruihhlo laka fihlim tur te, mipat hmeichhiatna hman khawloh laka fihlim tur leh, an zirlaite ṭha taka zira thawh chhuah an neih hma chuan nupui/pasal nei lo turtein thu an tiam a ni.