Rualbanlote Ni hman a ni

Nimin kha khawvel puma Rualbanlote Ni, International Day of Persons with Disability a ni a; Mizoram hmun hrang hrang­ah pawh hman niin, Aizawl­ah chuan Social Welfare, Women & Child Development minister Lalrinpuii hoin Dawrpui Multi­purpose Centre-ah hman a ni.

Kumin Rualbanlote Ni thupui chu 'Fostering disability-inclusive societies for advancing social progress' tih a ni.

Lalrinpuii chuan, pianphunga rualbanlo (vohbik) te puala ni bik hman a ni chu a lawmthu a sawi a, "Eng hmasawnna pawh huapzau lo chu a khingbai a, sorkar pawhin vantlang hmunte chu rualbanlote awlsam zawka an chet ve theihna turin a ruahman zel. India ram pum huap pawha infiamna lamahte pawh Mizoram aiawh rualbanloten lawmman an la theite hi an chhuanawm hle," a ti a, vohbikte chu theihtawp an chhuah phawt chuan eng kawngah pawh sang tak an thleng thei tih inhre reng turin a chah.

Khualzahawm Vanlaldiki Sailo, Mizoram state commis-sioner for PWDs pawhin thusawiin, vohbikte chu khawtlang tana mi ṭangkai ni tura inbuatsaih turin a chah a, "Mahni inhmu hniam ngai reng reng lo turin ka duh che ua, sorkar, kohhran leh khawtlang hi in lamah an ṭang tlat a, hma in sawnna turin theihtawp chhuah an inhuam tih hre reng ang che u," a ti.

International Day of Persons with Disability hmanna inkhawm hi Social Welfare, Women & Child Development department leh SELCO Foundation bakah ALIMCO leh NILD-te ṭangho buatsaih a ni a; SWWCD additional secretary Lalnunhlua'n a kaihruai a ni.