KHAWTHLIR

Kawng siam mek endik

Nimin khan dy speaker Lalfamkima hoin PWD enkawl kawnga PWD Minister puitu adviser to CM (technical) H Ginzalala leh Lunglei South bialtu MLA T Lalhlimpuiate chuan Sairang - Vairengte inkar kawng siam mek an endik. Lalfamkima chuan kawng ṭhatna tur leh hmasawnna turin sorkarin theihtawp chhuahin, mawh a lak thu a sawi.

Meth an man

Excise & Narcotics department leh Assam Rifles ṭangkawp chuan December 2, Thawhlehni khan Champhai Venglaia Lalen Vengah methamphetamine kg 5.55 an man a, a neitua puh Zolianthangi (47) d/o Sangkhuma (L), Lalen Veng nia inchhal an man. Heng methamphetamine-te hi Karimganj, Assam-a hralh tura buaipui mek laia man a ni.

Sikul 3-ah pawisa pe

Minister of state Lalnghinglvoa Hmar chuan December 2, Thawhlehni khan a pisaah a bial Aizawl West-II chhunga zirna-in pathum - MICE, Gairigaon Primary School leh Dinthar Middle School-II te hnenah ṭanpuina Rs 3,00,000 a hlan. Minister chuan, sorkar sikulte chu zirtirtu trained leh qualified zawk awmna a nih avangin zirlai tam zawk an luh theihna tura hmalak a pawimawh thu a sawi.

Tlawh theih dawn

Governor chenna Lok Bhavan chu kumin Krismas leh kum thar 2026 pualin December 24-26, 2025 leh January 1-3, 2026 khian mipui tlawh theih tura hawn a ni dawn a; heng hunahte hian ni tin dar 10 aṭanga tlai dar 4 thleng mipui tlawh theiha hawn a ni dawn.

Ṭanpuina pe

Mizoram Primary Teachers’ Association (MPTA) chuan nimin khan Zarkawt Community Hall-ah Mizoram hmun hrang hranga zirlai thlan chhuah 28 hnenah ṭanpuina Student Endowment Fund an pe a; School Education director Angela Zothanpuii’n a hmanpui. Student endowment fund sem inkhawm hi MPTA vice president R Zonunmawia'n a kaihruai a, president Rosangzuala pawhin thu sawiin, MPTA hruaitute, zirlai ṭanpuina dawngtute leh anmahni hruaitute an tel.

Khawzawl DCC

Khawzawl district bawrhsap K Vanlalṭhiana kaihhruaiin nimin khan District Consultative Committee (DCC) chuan kumin June - September quarter chhunga Khawzawl district-a bank hrang hrangte hmalak dan leh harsatnate thlirho a ni a; bank-te'n kâng ṭhelhna (fire extinguisher) an mamawh leh mamawh lohte enfel ni se, CCTV vuah a nih leh nih lohte enfel ni se, an ti a; ni 10 chhungin report thehluh turin an rel.

Inspection team din

Champhai district bawrhsap Mohammad Aaquib hoin nimin khan DC conference hall-ah Clinical Establishment (Registration and Regulation) Rules, 2014 Section 10 hnuaia din 'District Registering Authority' an ṭhukhawm a; damdawi in leh inentirna hmunte'n dan an zawm leh zawm loh endiktu tur inspection team an din a, dan anga inentirna hmun kalpui lote chu hrem an nih dawn thu tarlan a ni.