Sorkar hnathawkte intuaihriamna tur atan thawhhona thuthlung ziah a ni

Nimin Mission Karmayogi – National Programme for Civil Services Capacity Building (NPCSCB) hnuaia sorkar hnathawkte intuaihriamna tura hmalakna kal zelah, Mizoram sorkar, Capacity Building Commission leh Karmayogi Bharat (SPV) ten thawh hona thuthlung, Aijal Club-ah an ziak.

Thawhhthona thuthlung ziah inkhawm hi chief secretary Khilli Ram Meena chuan kaihruaiin, Mizoram sorkar aiawhin DPAR (Good Governance & Training Wing) secretary YLN Reddy, CBC aiawhin secretary Shyama Prasad Roy leh Karmayogi Bharat (SPV) aiawhin CEO Chhavi Bharadwaj te'n hming an ziak.

Chief Secretary chuan Mission Karmayogi thil tum tlangpuite sawiin, "Sorkar hnathawkte’n an chanvo leh an mawhphurhnate, dan in a phut vang mai ni loa rinawmna, dikna leh thathonate nena an hlen theihna tura hmalakna a ni. Sorkar ṭha leh chak a awm theihna tura lungphum pawimawh berte zinga mi a ni," a ti.

Thawhhona thuthlung hnuaiah hian Capacity Building Commission-ten policy duan leh sorkar kaihhruai hna an thawk anga; Karmayogi Bharat (SPV) ten technical leh digital lam enkawlin iGOT Platform an vil ang. Mizoram sorkar nen ṭanghoin, tunlai mil zelin Capacity Building & Training Plan-te duan a ni ang. Mizoram sorkar hnathawkte tan intuaihriamna programme hrang hrangte duan niin, chin dan ṭha zawk leh learning material-te pawh in-share tawn zel a ni dawn.

Online-a training theihna iGOT Karmayogi Platform-ah department hrang hrangte leh sorkar hnathawkte telh niin, iGOT kaltlang hian competency passbook, integrated digital certificate pek ṭhin an ni ang.