ZPM MLA-te'n runway cheiṭhat mek an tlawh

December 2, Thawhlehni zan khan Chief Minister leh PWD Minister hriatpuinain Lengpui Airport runway cheiṭhat mek chu dy speaker Lalfamkima bakah PWD bika Vanlalhlana puitu adviser to chief minister (technical) H Ginzalala, MLA leh Lunglei West bialtu MLA T Lalhlimpuiate'n an tlawh a, PWD hotute'n an lo dawng sawng.

ZPM thuchhuah tarlan danin, hnathawh mekna hmunah hian MLA-te leh PWD official-ten an hnathawh lai an endik a ni. Dy Speaker chuan, "Mi tam tak nunna chan theihna hmun a nih avangin runway neih ṭhat a pawimawh. Kan ram hmel hmang lanna pakhat a ni. Runway a ṭhat loh chuan Mizo mipui zin vei vak bakah state pawn aṭanga khualzinten harsatna an tawk ṭhin," a ti.

H Ginzalala pawhin pawhin thu sawiin, "An hnathawh tawh leh thawh mekte kan enin a ṭha thawkhat hle. Laboratory Testing Room thlengin kan luh chilh a, tun dinhmunah chuan sawiselna tur kan nei lo. Temperature te, a chhah zawng te, a chak zawng te, levellling te leh tehna dang te pawh a hmunah kan enpui vek," a ti a, an hnathawh a ṭhat thu a sawi.

Thusawitu dang T Lalhlimpuia chuan Lengpui Airport pawimawhna hriaa runway siam ṭhatna tur ngaihtuahtu Chief Minister leh a thawhpuite an chhuanawm hlea a hriat thu sawiin, "Zan khuaa hnathawktute leh a viltu PWD-te pawh an fakawm hle," a ti.

ZPM thuchhuah tarlan danin, Lengpui Airport runway siamṭhat mek hi SASCI 2025-2026 Part-I AA hnuaiah ‘Upgradation of Lengpui Airport (Upgradation of Runway to PCN 50)’ tih a ni a, hnathawh nan cheng vbc 91 dah a ni a. Hna hi Aairport runway recarpeting (siamthat) lama sulhnu nei tha tak Brahma Infratech, Rajasthan ten an thawk mek.

Chhun lamah hna a thawh theih loh avangin zan khatah a tlangpuiin sq metre 2500-2800 an thawk hman ṭhin. Chhun lama thlawhtheihna a tum leh theihna turin zingkarah PWD-ten quality test an nei ziah a, chu chu Air Traffic Controller (ATC) in a pawmpui leh vek a ngai a ni.

November 10, 2025 aṭang khan hna hi thawh tan a ni a, April 2026-ah thawh zawh tum a ni. Lengpui Airport runway siamthat hnuhnung ber chu kum 2020 niin, 36 PCN-in siam a lo ni tawh a, tunah hian 50 PCN chung lam ni turin siam mek a ni. Thlawhtheihna lian zawk pawh tum thei tura beisei a ni.

Ṭum danga runway siamṭhat ang loin, technology sang zawk, German company siam milling machine hmangin mm 150 a chahin runway pumpui hi mill chhuah vek a ni dawn. MM 170-a chhahin, a thara siam tur a ni.