PE department leh LC-te an ṭhukhawm; Power supply-a hmasawnna tur sawiho

Nimin khan Aizawl veng hrang hrang local council (LC) aiawhte leh Power & Electricity department hotute'n, PE Engineer-in-Chief conference hall-ah power supply lamah tun aia hmasawnna neih dan turte leh thawhhona ṭha zawk neih dan turte sawiho a ni.

Aizawl City Local Council Association (ACLCA) president C Lalbiaknunga chuan Aizawl khawpuia power supply ṭha lehzual a awm theihna tur leh khawpui tih hmasawnna tura inhmuhkhawmna hun ṭha an nei thei chu lawmawm a tih thu sawiin, "Mipuite mamawh kawlphetha pek chhuah kawngah PE department thawhpui turin LC tinte kan inring reng," a ti.

Ṭhutkhawmah hian mipuite hnena hriattir zung zung dan tur te, mipuite hnena power supply ṭha zawka pek a nih theih nana line leh transformer-te dahna hmun tur ruahman chungchang te, electric bana a hrui inthlung hnawk lutuk tih fai leh a hnawk lehzel tur ven kawnga hmalak hona turte rel a ni. Mipui him zawk nana electric ban leh line hnai lutuka in sak leh electric hrui fual lutuk awm loh nana hmalak te, power supply bo thlau - power pawh ruk, spark nasa, chhun lama street light eng leh ṭul loa power ti hek thei thil dangte ven kawnga hmalak ho dan turte sawiho niin, Krismas leh kumthar hunpui lo thleng tur atana inbuatsaihna chungchangte sawiho a ni bawk.