PHE tui pût report tamte chawimawina hlan: 'Smart metering hman tum a ni' - PHE Minister

PHE department chuan nimin khan an conference hall-ah PHE tui pût (leak) report-na application hmanga report tamte chawimawina hun an buatsaih a; hmanpuitu PHE minister Prof. Lalnilawma chuan, smart metering hman tum a nih thu a sawi.

Prof. Lalnilawma chuan, tui semnaah smart metering hman tumin theihtawp an chhuah thu a sawi a, "Smart metering hi 7th Day Tlang aṭangin 24 hour-in bul kan ṭan ang a, a hlawhtlin chuan Aizawl khawpuiah hman chhunzawm kan tum," a ti.

PHE department-in hma a sawn ve zel a, tui bill pekna application hranpa siam tum a nih thu sawiin Minister chuan, "GPay ring ngam tawk lote awm theih a ni," a ti a; tui bill pekna liau liau application siam a nih hunah chuan mipuite'n an ṭangkaipui tur thu a sawi.

PHE Minister chuan, Tlawng lui aṭangin sum tam tak sengin tui pump a nih thu sawiin, "Kan pipe-te a hlui tawh a, kum 15 daih tur anga chhûtte kum 20-30 te a lo ni tawh a, leak a tam. Tui nasa takin a kal ral phah a ni," a ti.

Tui pût report a ni ṭhin chu a ṭangkai hle tih sawiin Lalnilawma chuan, "Department lamin bawhzuiin, tui kan chân tur a ven phah theih. Connection lakna aṭanga leak erawh a neitute mawhphurhna a ni," a ti a, a neitute'n an ngaihsak loh chuan an connection tihtawpsak theih a nih thu a sawi.

PHE Minister chuan, an mutàn lian ber pakhat, Hualtu aṭanga lei hîpna (gravity) hmanga tui lakah hma an sawn ve zel thu sawiin, "Vawi 23 chuang test a, a puak zel. Chinfel dan a awm lo maw tiin hma kan la a, zanlai thleng thlengin thawktute'n an kal chilh a ni," a ti.

Prof. Lalnilawma chuan, Hualtu aṭanga tui lak hmangin Mualpui thleng tui tihhaw theih a nih tawh thu sawiin, "Aizawl veng chhim lam leh chhim lam khaw eng emaw zat Hualtu aṭanga tui lak hian a châwm thei dawn," a ti a, zawh a nih hunah tui a hnianghnar sawt tur thu a sawi.

Inkhawm hi PHE enigneer-in-chief Zodin-thari'n a kaihruai a, PHE Minister hian lawmman dawngtute hnenah chawi-mawina a hlan a ni