Minister-in cold storage a hawng

Agriculture and Farmers Welfare minister PC Vanlalruata chuan nimin khan Thingdawl Agriculture Farm-ah alu chi dahṭhatna tura siam solar powered cold storage a hawng. Cold storage hi alu chi metric ton 100 dahṭhatna tura siam niin, cheng nuai 258 sen a ni.

PC Vanlalruata chuan, "Kan kut hnathawktute'n an harsatna ber chu alu chi ṭha an hmu thei lo hi a ni a, Mizoramah alu a ṭha duh si a, tuna a chi dahṭhatna kan nei thei ta hi a lawmawm hle. He cold storage hian nasa takin loneitute a puih ngei a rinawm," a ti.

Assembly deputy speaker Lalfamkima, Kolasib bialtu MLA pawhin thu sawiin, a bial chhung­ah alu chi dahṭhatna cold storage bun a ni chu a lawm thu a sawi a, "Kum tin hmun dang aṭanga alu chi lak luh a ngai dawn ta lo a, a lawmawm tak zet," a ti a; chief minister Lalduhoma kaihhruai sorkarah kut hna­thawktute an phûr em em a, sum pawh an thawk chhuak ṭha tawh hle niin a sawi.