LADC-ah vote 83.99% a tla

December 3, Nilainia Lai Autonomous District Council (LADC) hnuaia MDC inthlan neih zawh tâkah vote 83.99% a tla.

LADC-ah hian MDC bial 25 awmin, vote nei mi 56,873 an awm a, mi 47,769-in vote thlakin, vote tla zat hi 83.99% a ni. Vote tlak ṭhatna ber Sakeilui bialah voter 3,993 zinga mi 3,777 (94.59%)-in vote an thlak a, vote tlak chhiatna ber Lawngtlai Chandmary bialah chuan voter 2,850 zinga mi 2,096 (73.54%)-in an thlak a ni.

LADC inthlanah hian candidate 80 an awm a; political party-te candidate neih zat chu ZPM-in 25, MNF-in 20, INC-in 14 leh BJP-in 10 a ni a, independent candidate 11 an awm bawk. Inthlana vote tlate chu December 9, 2025 zing dar 8 aṭangin Lawngtlai College-ah chhiar a ni ang.