KHAWTHLIR

Thisen pe

Mizoram Home Guard & Civil Defence chuan nimin khan thisen pek an huaihawt a, Civil Hospital, Aizawl tan thisen unit 25 pein, Civil Hospital, Lunglei blood bank tan thisen unit 15 an pe bawk.

Kum 25-na lawm

South Sabual khua chuan December 3, Nilaini aṭang khan an khaw kum 250 tlin an lawm a, December 3 zan khan bialtu MLA Dr R Lalthangliana'n a hmanpui. Sabual khua hi Mizoram chief minister hmasa ber Ch Chhunga pa Chalṭhianga (CL Ṭhianga), Rothangpuia (RTP), KL Berema leh Central YMA general secretary ni mek Prof. Malsawmliana te chhuahna khua a ni. Kum 25-na lawmna hi vawiinah khâr a ni ang.

Sikpui Ruoi hmang

Hmar Students' Association inkhawmpui lian, General Assembly vawi-60 na leh Sikpui Ruoi chu December 3, Nilaini zan khan Rev. Dr HS Thanglung Hall, Saipumah hman ṭan a ni a, Sinlung Hills Council chief executive member Ricky Lalremsanga'n a hmanpui. Sikpui Ruoi pui ber chu naktukah hman tur a ni a, chief minister Lalduhoma'n a hmanpui ang.

Khiangte Tours

Tourism director R Lalrodingi chuan nimin khan MPSOA conference hall-ah Mizorama tour package buatsaihtu Khiangte Tours website www.khiangtetours.com a hawng. Khiangte Tours hian Mizoram hmun hrang hrang tlawh theih turin tour package an siam a ni.

Green Vision Centre

Orbis International leh Mizoram Synod thawhhonaa din Reieka Green Vision Centre chu nimin khan Orbis country director Dr Rishi Raj Borah chuan a hawng a, Reiek bialtu pastor Rev. H Zaṭhuama'n Pathian hnenah a hlan. Centre hawn a nih hnuah mit entirna hun hman nghal a ni. Green Vision Center hi tele-ophthalmic vision center a ni a, optometrist-in a ṭhut chilh dawn a ni.

Lehkhabu tlangzarh

Lallunghnema buatsaih 'Consumer-te Zin Kawng’ tih lehkhabu chu nimin khan Aizawl Press Club-ah Information and Public Relations minister B Lalchhanzova'n a tlangzarh. B Lalchhanzova chuan, consumer-te dikna chanvo humhalhna kawngah ṭanrual a ṭul thu a sawi.

National seminar

Aizawl College leh Central Hindi Directorate, New Delhi chuan nimin khan IPR Auditorium-ah ni hnih awh 'National seminar on Purvottar ki Lok Paramparayein: Sanskrit Virasat ke Jeevit strot (Folk Traditions of Northeast India: Living Sources of Cultural Heritage)' an buatsaih. Zirhona hi Guwahati Sahitya Sevi aṭangin Dr Jagindra Rai Choudhary leh Dr Pavan Tiwari ten an hmanpui a ni.

NAPS zirho

LESDE department bultumin December 3, Nilaini khan Lunglei leh Champhaiah Prime Minister’s National Apprenticeship Promotion Scheme (PM-NAPS) leh Apprenticeship Portal chungchang inzirtirna buatsaih a ni. Zirhona hi district bawrhsapte'n an hmanpui a, NAPS chung-chang zirho a nih bakah, Apprenticeship Portal-a inziah luh hun hawn a ni.

Sa man bithliah

Serchhip district bawrhsap Paul L Khuma chuan thupek tichhuakin, December 13, 2025 aṭangin Serchhip khaw chhungah vawksa man kg khatah Rs 450 a nih tur thu a puang. Vawk sa man hi The Mizoram Market (Regulation and Facilitation) Act 2022-in District Level Committee on Fixation of Price of Meat, Vegetables and Fruits-in thuneihna a pek anga bithliah a ni.