Chief Minister-in zirlai hmeichhiate a kâwm

Chief minister Lalduhoma chuan nimin khan Aizawl Sumtual, MINECO-ah Mission Shakti hnuaia State Hub for Empowerment of Women (SHEW) buatsaih, hmeichhe zirlai naupangte nena inkawmna, 'Meet Your CM With Adolescent Girls: A Celebratory Plantation of Trees under BBBP' a hmanpui.

CM Lalduhoma chuan, ZPM sorkar chu Mizoram chanchina cabinet minister atana hmeichhia nei hmasa ber a nih thu a sawi a, "Kan MLA Pi Baryl Vanneihsangi chuan kan ram rorelna sang ber Assembly session min lo kaihruai tawh a, a hmasa ber atan Gender Budget kan nei bawk. Kan officer-te zingah hmeichhia an tam hle a, sorkar office tin hi han fang ila, thawktu zingah hmeichhia an tam deuh zawk zel. Kan sumdawnna hmunte chu kan hmeichhiate enkawl deuh vek a ni," a ti.

Mizorama vote nei zingah pawh hmeichhia an tam zawk a, hmeichhia thi an tlem zawk thu sawiin Lalduhoma chuan, "Kan hnam zia leh tihphungah hmeichhiate thliarna a tam lem lo a, hnam dangte nena khaikhin chuan a ziaawm pawl tak kan ni. Kan sorkar hian kan hmeichhiate venhimna leh chawikanna kawngah theihtawp kan chhuah a ni," a ti a; hmun pasarihah working women hostel thar tur sak mek a ni a, sak zawh tawh pasarih a awm bawk thu a sawi.

Women & Child Development (WCD) minister Lalrinpuii pawhin thu sawiin, WCD scheme Mission Shakti hnuaia BBBP (Beti Bachao Beti Padhao) hnuaia CM leh hmeichhe tleirawlte inbiakpawh theihna hun leh thing phunna hun buatsaih a ni chu lawmawm a tih thu a sawi a, "Hmeichhiate humhimna leh chhawmdawlna scheme hrang hrang a awm a, hre chiang duh tan engtik lai pawhin toll free number 181-ah zawh theih reng a ni," a ti.

Inkawmnaah hian St Paul’s Higher Secondary School, JL High School, Chawnpui High School, Neuhof English Medium School leh Mount Carmel School zirlai hmeichhiate an tel a; zawhna an neihte Chief Minister-in a chhang a ni. Aizawl Sumtualah hian thing an phun nghal bawk.