Lungleiah MzSU hmunhma tur thlithlai

Lunglei High Powered Committee (HPC) member-te chuan an vice chairman V Malsawmtluanga, MLA hoin nimin khan Lungleia Mizoram State University dah tura hmalakna bawhzuiin, administrative building atana in luah tur an thlithlai.

Lungleia MzSU din turah hian Mizoram sorkarin Lunglei HPC chu a hmunhma tur thlan, administrative building tur leh a ṭul pawimawh hrang hrangte dapa hma la tura tih a ni a; HPC chuan an bawhzui mek a ni. Lungleia tlawmngai pawl aiawhte leh mi challang leh pawimawhte pawh an kâwmin, MzSU hmunhma tur leh ṭul turte an sawipui tawh.

Nimina MzSU hmun hma leh administrative building atana in luah tur dapnaah hian V Malsawmtluanga bakah, member dang - Lalramliana Papuia (MLA), C Lalhmingliana (ZPM Southern Hqrs President), Rev. F Sangvela, H Lalzarliana leh C Vanlalmuana ten an tel.

HPC hian MzSU hmunhma tur leh administrative building atana in luah turte an tihfel thuai beisei a ni a; an ruahmannate chu State Legislative Assembly pawmpui turin sorkarah an thehluh dawn a ni.