Kolasib-a mi 50 hnenah alu chi sem

Agriculture and Farmers Welfare minister PC Vanlalruata chuan nimin khan Kolasib KVK training hall-ah Kolasib district khaw pasariha loneitu mi 50 hnenah Indian Agricultural Research Insitute, New Delhi aṭanga hmuh alu chi leh damdawi a sem.

PC Vanlalruata chuan, alu chi dawngtu loneitute chu hlawhtlinpui ngei tura fuihin, "Alu in chìnte enkawlna tur damdawi nen in dawng dawn a, thar chhuah tam lamah national average kan phâk lo nia sawi pawh phâk ngei tumin ṭan lak a ṭha," a ti a, harsatna an neih chuan KVK mithiamte ráwn zel turin a chah.

Mizoram GDSP-ah agriculture-in a thawh tam lo tih sawiin Minister chuan, "Kuminah sawhthing man aṭangin kut hnathawktute'n cheng vaibelchhe eng emaw zat an la lut a, hei pawh hi sorkar support-na a ni," a ti a; sorkar puihna tel loa GDP-a agriculture-in tun aia sang zawk an thawh ve theih nan hmalak a ṭul thu a sawi.

PC Vanlaruata chuan, KVK-te chu Mizoramah chuan Agriculture department rinráwl ber an nih thu sawiin, "Kut hnathawktute tan in thawhrimna a hlu hle. Kolasib, Mamit leh Lawngtlai te hi agro-culture lama theihna nei ṭha district an ni a, Mizoram sorkarin thlai thar a lei tur zinga mi sawhthing an ching ve hlei thei lo thung. Hei hi a chhan zir chian a ṭha khawp mai," a ti a; KVK mithiamte chu ngaihtuahna sêng turin a chah.

Agriculture Minister hian SASCE (2022-2023) sum hmanga sak Plant Health Clinic a hawng a; Agriculture director R Lalnunzira bakah KVK Kolasib head Dr Michelle C Lallawmkimi te pawhin thu a sawi a ni.