Ruihhlo donain rah ṭha a chhuah mek - Mizoram DGP

Director General of Police (DGP) Sharad Agarwal chuan Mizoram Police-in ruihhlo donaah nasa taka ṭan an lak thu leh, chu chuan rah ṭha a chhuah mek thu a sawi a; hunpui thleng tur vuakvetah hâlpuah leh a kaihhnawih thilte khapna kengkawh turin theihtawp an chhuah mek thu a sawi bawk.

Sharad Agarwal chuan, ruihhlo donnaah police-te'n nasa takin hma an la tih sawiin, "Khawtlang nen kan ṭang rual a, a bikin takn ramri hnaih khaw hrang hrangah hma kan la nasa a, district tinah theihtawp kan chhuah mek zel. Kan hmalakna hian rah ṭha a chhuah mek a ni. Ruihhlo leh sualna hrang hrang donaah i thawkho zel ang u," a ti.

Mizoram sorkarin hunpui laia halpuah leh a kaihhnawih thilte a khapna an bawhzui dan zawhna chhangin DGP chuan, "Mizoram luhka hrang hrangah lirtheite endik reng a ni a, mahse, lirthei leh mipui lut chhuak zawng zawng endik vek erawh a harsa hle. Hâlpuah khap reh vek a harsa a, mahse, theihtawp kan chhuah mek," a ti a; halpuah leh a kaihhnawih thil khapna thupek bawhchhia report a awm chuan an bawhzui zel dawn a, dan anga action lak tur zel tur a nih thu a sawi.

Sharad Agarwal hian kumin July thla khan Mizoram DGP hna a zawm a, nimin khan DGP conference hall-ah thuthar thehdarhtute léngah sáwmin, thingpui a inpui a; sualna chi hrang hrang an donaah theihtawp chhuahpui turin press mite a sáwm a ni.

DGP chuan, Krismas hunpui a thleng chho ṭan mek tih sawiin, mipui himna turin police-te'n theihtawp an chhuah mek thu a sawi a, "Krismas dawnah hian a ṭul angin police kan dah belh. Khawpui dái velah pawh patroling tih ṭhin a ni a, mamawh dan azirin police patroling pawh tihbelh zel a ni dawn," a ti.

Sharad Agarwal hi January 6, 1973-ah Kanpur, Uttar Pradesh-a piang a ni a, zirna lamah IIT, Delhi aṭangin B.Tech. (Civil Engineering) leh M.Tech (Water Resources Engineering) a zo a, Goa University aṭangin LLB a zo bawk. Kum 1997 kha IPS a zawm a, AGMUT cadre a ni.