Kan unau sahimna zawngte tan theihtawp kan chhuah - CM Duhoma

Institute of Chin Affairs (ICA) chuan December 4, Ningani tlai khan Aijal Club-ah 'Together for Humanity Friendship Dinner' an buatsaih a; an hun hmanpuitu chief minister Lalduhoma chuan, Zo hnah­thlak, sahimna zawngte tan theih­tawp an chhuah thu a sawi.

CM Lalduhoma huan, khawvel hmun hrang hranga cheng Chin mite din ICA hnathawh hrang hrangte chu ropui a tih thu sawiin, Chin mipui tan malsawmna ni zel turin duhsakna a hlan a, "Friendship dinner pawhin rah ṭha a chhuah ngei ka beisei. Tun hnaia Myanmar buai tirh phat aṭang khan Zo fate Jerusalem - Mizorama chengte chuan kan unau, sahimna zawnga rawn raltlante buaipui reng rengin hun kan lo hmang a, NGO leh Mizoram sorkarin a theih ang angin kan lo dawngsawng ṭhin a ni," a ti.

Zo hnahthlakte sahimna tura hmalaknaah Mizoram leh sorkar bán sei tâwk lo mah se, an theih tawk an chhuah tih an hriatsak a rin thu sawiin Lalduhoma chuan, "Kan theihtawp kan la chhuah zel dawn a, kan ṭanho tlat chuan lungngaihna tur a awm lo. Vawiina kan harsatna tawh mekte ṭha taka kan hmachhawn theih nan Chin state chhunga Zo fate inlungrual a, zai khata luangza turin ka ngen a ni," a ti a; inlungrual loh chuan mi dang tan hneh awlsam tak nih theih a nih thu a sawi.

Chief Minister chuan, Chin mipuite chu thukhat vua a, inkaihhruaina pakhat hnuaiah, tum thuhmun neia awm turin a sáwm a, "Vawiina dinner pawh hian chu chu a thiltum a ni. Tu pawhin India sorkar zah takin thil ti zel ang che u," a ti.

Minister Lalrinpuii pawhin thu sawiin, raltlan Mizorama lutte hriselna sorkarin a theih ang anga a buaipui dan a tarlang a; minister of state Prof. Lalnilawma'n thu a sawi bawk.

Inkhawmah hian ICA information officer Salai Van Sui San chuan an pawl din chhan, thil tum leh an hmalak tawhnate a sawifiah. ICA hian Chin state-a buaina tuartu mipui hriselna leh zirnate buaipuiin a ṭanpui ṭhin a, lungrual taka an kal theih nan hma an la ṭhin a ni.