KHAWTHLIR

Thisen pe

HDFC Bank chuan nimin khan Civil Hospital, Aizawl tan thisen unit 27 an pe a, petute mipa 19 leh hmeichhia pariat an ni.

Kum 250 tlin lawm

South Sabual khua chuan nimin khan an kum 250 tlin an lawm a, an hun hmanpuitu adviser to chief minister Lalmuanpuia Punte-in kum 250-na lungdawh a hawng a, J Remtluanga buatsaih South Sabual chanchin ziahna lehkhabu a tlangzarh. South Sabual hi kum 1775 khan Laltuaka Sailo din a nia tarlan a ni.

Halpuah khap

Lunglei District Magistrate chuan mipuite'n boruak ralmuang tak hnuaiah Krismas leh kumthar an hman theih nan, hâlpuah, hâlmawi leh meithallàwn (sky lantern) leh silai lem a mu kap chhuak theite kawl leh hman a khap. Khapna thupek hian ni 60 chhung a huam a, thupek zâwm lote chu Bharatiya Nyaya Sanhita (BNS) Section 223 hmanga hrem theih a ni.

Cultural Meet

Art & Culture department, Mizo Cultural Organisation (MCO) Lunglei leh Mualṭhuam North Branch YMA te chuan nimin khan Mualṭhuam North GSA Playground-ah Cultural Meet an buatsaih a, Lunglei Municipal Corporation chairman Lalzuithanga'n a hmanpui.

Review meeting nei turin hriattir

Rural Development & Administration department chuan mipui tana hna ṭha zawka thawh a nih theih nan leh Rural Development hnuaia scheme-te hlawhtling taka kalpui zel a nih theih nan, an hnuaia district level RD officer-te chu RD hnuaia scheme awm zawng zawngte thlirletna ‘quarterly review meeting’ nei ṭhin turin a hriattir.