AMC-in budget ennawn, vbc 114.04 pawm

Aizawl Municipal Corporation (AMC) Board of Corporators (BoC) chu nimin khan AMC BoC Meeting Hall-ah an ṭhukhawm a; kum 2025-26 budget ennawnin, revised budget estimate 2025-26 atan cheng vbc 114.04 an pawm.

AMC BoC ṭhutkhawm hi mayor Lalrinenga Sailo-in a kaihruai a, executive corporator (Cash & Accounts) Lalringliana'n kum kal mel 2025-26 budget revised estimate pharhin a sawifiah.

Lalringliana sawi danin, AMC 2025-26 budget revised estimate pawm tâk chu cheng vbc 114.04 a ni a, budget estimate 2025-26 aṭangin nuai 186.97-in a pung. AMC budget zinga cheng vbc 91.52 (80.25%) chu mipui hmasawnna kaihhnawih (development work) thawhna atan hman tur a ni a; corporator leh thawktute hlawh kaihhnawih atan vbc 15.73 (13.79%) hman tur niin, local council lawmman leh a kaihhnawih atan cheng nuai 122 dah a ni.

AMC sum hnâr lian ber chu 15th Finance Commission grant niin, kum 2024-25 leh 2025-26 atana grant hmuh beisei chu vbc 60.30 a ni a, hmuh a la ni lo. State sorkar aṭangin cheng vbc 25.57 hmuh beisei a ni a, AMC-in a thawh chhuah (Own Source of Revenue) chu vbc 7.5 a ni. Aizawl Smart City Ltd aṭangin cheng nuai 20 leh Swatch Bharat Mission aṭangin nuai 2 hmuh a ni bawk.

Lalringliana chuan, AMC ward tinah Ward Development Fund atan cheng nuai 73 ṭheuh ruahman a nih thu leh, term kal mekah corporator-te'n an ward ṭheuhah mipui mamawh (public amenities) ṭha tak an hnutchhiah ṭheuh thu a sawi.

AMC hian term hmasa lama project awm tawhte chhunzawmin, zawh a ni tawh hlawm a; chung zinga a langsar zualte chu - AMC Eco-Park Zonuam, AMC Eco-Park Ailawng, AMC Plaza Bawngkawn, AMC Multi-Complex Tuikual South, AMC City Bus Terminal Zemabawk te a ni. Project kal mek a awm nual bawk.

AMC BoC ṭhukhawm hian Naming of Streets and Numbering Committee-in a rawt kawtthler, hmun leh step hming a phuah tharte chu an pawm bawk a ni.