ESIC-in dependent benefit (pension) an pe

Sorkar laipuiin mimal sumdawnna hnuaia thawkte hamṭhatna (social security) atana a din Employees State Insurance Corporation (ESIC) chuan an hnuaia inziak lut, kumin February thlaa a hnathawhna kaihhnawih vanga thi Samuel Lalramthanmawia nu leh pate hnenah dependent benefit (pension) an pe a; pension hi Samuel-a nu leh pate hian an dam chhungin an dawng dawn.

ESIC, Mizoram hotute hnen aṭanga thu dawn danin, Samuela Lalram­thanmawia, Salem Veng hi Trinity Hospital-a thawk a ni a, ESIC-a inziak lut niin, a hnathawhna kaihhnawihah February 2025 khan a thi a ni. ESIC scheme hnuaia dependent benefit (pension) hmangin a nu leh pate hnenah Trinity Hospital-a a hlawh lak ṭhin aṭanga 90% chu thla tin ESIC kaltlanga pek a ni dawn a; Mizorama ESIC hnuaia inziak lut zinga dependent benefit (pension) pek hmasak ber an ni.

Employees’ State Insurance (ESI) Act-in a tarlan angin, ESIC-ah hian sumdawnna hmun engpawh mi 10 aia tlem lo thawktu awmnate chu an inziak lut ngei tur a ni a; heng hnuaia thawk ESIC-a inziaklutte leh an chhungte tan hian hamṭhatna hrang hrang duan a ni.

ESIC hi Mizoramah chuan Labour, Employment, Skill Development & Entrepreneurship department hnuaia awm niin, Aizawlah Regional office leh inentirna (dispensary) an neih bakah, mimal leh sorkar damdawi-in/laboratory hrang hrang nen an thawkho mek a, heng damdawi-in/laboratory-ahte hian ESIC-a inziaklutte leh an chhungte hian a thlawnin enkawlna an dawn theih bakah, ESIC thawhpui ni lo sorkar damdawi-inahte chuan senso an bill thei bawk.