CM-in HSA Sikpui Ruoi a hmanpui

Hmar Students Association (HSA) chuan nimin khan Saipumah General Assembly leh Sikpui Ruoi an lawm a, chief minister Lalduhoma'n hmanpuiin, Zo fate inpumkhatna fatua ṭang zel turin Hmar hnamte a chah.

Chief Minister chuan, Hmar hnam chu Zo hnahthlak hnamte zinga a lian ber pawl an nih thu sawiin, "Mizo hnam khaidingtu zinga mi in ni. Tun hmaa Hmar mipuite sûlhnu Mizoram laili velah hmuh tur a tam hle," a ti a; Hmar hnam chu a khaipa leh a lian pawl an nih thu sawiin, Zo fate inpumkhatna ngai pawimawh a, inpumkhatna fatua ṭang zel turin a chah a ni.

HSA chu Zo fate'n zirlai pawl kan neih zinga a upa pawl a nih thu sawiin Lalduhoma chuan, "Kum 1939-a a din tirh ata vawiin thlengin Hmar ṭhalai rual te, a bikin zirlaite tan hna a thawk ṭha. Hnam zia humhalhna lamah te, inpumkhatna leh khawtlang hmasawnna kawngahte a thawh hlâwk hle a ni," a ti.

Lalduhoma chuan, sorkarin ṭhalaite tana hma a lakna langsar zual tarlangin, "Hna kan lakna reng reng hi dik leh thianghlim takin kan kalpui zel a, tu tan mah sawipuitu hran neih a ngai lo, an thiamna kha anmahni sawipuitu ṭha ber a ni," a ti a; kum hnih chhung lekin sorkarin hna ruak tam tak a hnawhkhat a, hna thar a siam a, MPSC calendar a khah hle reng thu a sawi.

Chief Minister hian Sikpui Lung a hawng a, HSA inkhawmpui lian souvenir a tlangzarh. Assembly speaker Lalbiakzama, minister of state B Lalchhanzova leh Manipur MLA pahnih Paolienlal Haokip leh Ngursanglur Sanate ten an hmanpui bawk.

HSA hi kum 1939 khan Imphal, Manipur-ah din a ni a, General Headquarters chu Tuiṭhaphai, Manipur-ah a awm. State hrang hrangah joint headquarters 13 leh branch paruk a awm bakah, unit eng emaw zat an nei a ni.