Hlawh tlem aiin hlawh neih loh a zahthlak zawk - LESDE Minsiter

Synod Multipurpose Training Centre (SMTC) chuan December 4, Ningani khan an hall-ah Graduation Day an hmang a; khuallian Labour, Employment, Skill Development & Entrepreneurship (LESDE) minister Lalnghinglova Hmar chuan, hlawh tlem aiin hlawh neih loh a zahthlak zawk thu a sawi.

LESDE Minister chuan, hnathawhah hlawh tlem a zahthlak loh thu sawiin, "Hlawh neih loh hi a zahthlak zawk. Trade hrang hranga thiamna zir chhuak ṭhalaite hi an hna bul ṭannaah hlawh a sang lo deuh a nih pawhin taima taka an thawh chuan hlawhtlinna a awm," a ti.

Bible-in, 'Thawk lo chuan ei pawh ei suh se' a tih rualin, 'Hna thawktu chu hlawh hmu tlak a ni,' a tih thu sawiin Lalnghinglova chuan, "Heng thil pahnih avang pawh hian hna kan thawk tur a ni," a ti a; hnathawhna atana pawimawh thiamna zir chhuakte a lawmpui thu a sawi.

Lalnghinglova Hmar chuan, Mizo ṭhalai zingah ei ringawt, ei tur zawng ve lo, eizawnna nei lo an tam pawi a tih thu sawiin, "Vawiinah chuan eizawnna kawng dap tura intuai hriam Mizo ṭhalai heti zat in awm hi a lawmawm tak zet a ni," a ti.

SMTC hi kum 1996-ah hawn niin, trade hrang hrangah zirna kalpui a ni a, kum 2021 aṭangin hostel hawn a ni. A din tirh aṭangin mi 2,000 chuangin thiamna hrang hrang an zir chhuak tawh.

Kuminah hian SMTC aṭangin mi 109-in thiamthil an zir chhuak a; chungte chu - women’s tailoring-ah mi 39, men’s tailoring leh electric wiring & repairing-ah mi 14 ve ve, DCA-ah mi 27, beauty culture-ah pakua leh mobile repairing-ah mi paruk an ni.