Sorkar sawhthing support price-ah sawisel duh nei tan thlen theih

Aizawl district bawrhsap Lalhriatpuia chuan hriattirna chhuahin, sorkarin sawhthing chingtute hnena support price a pek chhuah chungchanga sawisel duh nei tan sawisel theih a nih thu a tarlang.

Aizawl Bawrhsap chuan, Mizoram Agricultural Marketing Board (MAMB) kaltlanga sawhthing chingtute hnena support price a pek chungchangah sawhthing chingtu/hralhtu ṭhenkhat hnen aṭanga complaint dawn a nih thu a tarlang a, "Sawhthing chingtute'n an sawhthing hralhna aṭanga support price dik taka an dawn theih nan District Agricultural Marketing Committee (DAMC)-ah complaint thehluh theih turin ruahman a ni," a ti.

COMPLAINT THEHLUH DAN TUR
▶ Complaint-na lehkha chu primary society hruaitute'n SOP for Societies-a inziak angin sawhthing chu society member thar leh primary collection centre (PCC) kaltlanga hralh ngei, register/record buah a rih zawng leh quality a chuang ngei a ni tih an certify hmasa tur a ni.
▶ Chumi hnuah Secondary Collection Centre (SCC) hruaitu/enkawltu ten SCC-a Thlai Thleng Register leh Thlai Thleng Challan-ah a rih zawng dik tak nen ziah luh ngei a ni tih lanna photo copy nen DAMC-a thehluh turin an certify thei ang.
▶ Complaint-na lehkha chu primary society leh SCC enkawltu/hruaitu ten an recommend/certify hnuah DAMC-ah rawn thehluh tur a ni.
▶ Uluk taka DAMC-in a zir chian hnuah, support price pek tlak nia ngaihte chu MAMB-ah thehluh leh a ni ang.