CYMA-in kawng siam mek an enfiah; NH kawng siam mekah an lungawi lo

Central YMA hruaitute chuan December 6, Inrinni khan hmun pahnihah kawng siam mek an enfiah a, Vairengte leh Sairang inkar national highway siam mek chu lungawithlak loh an tih thu an sawi.

CYMA president R Lalngheta hoin CYMA hruaitute chuan PMGSY hnuaia Hlimen leh Lungleng inkar kawng siam mek chu hna thawktu contractor-ten hna an thawk muang nia an hriat avangin an tlawh a, contractor chu chak zawka hna thawk turin an ngen.

CYMA President chuan, YMA-in thil ṭha an duh thu sawiin, "Chak tak si, ṭha tak si a thawh kan duh a ni. Helai hna thawktute pawh Mizo tho in nih avangin kan ram tan theihtawp chhuah ve ula kan duh," a ti a; an thawk ṭha duh dawn lo emaw, an thawk ṭha thei dawn lo emaw a nih chuan 'Mi dangin thawk mai rawh se' tih chu YMA-in tih dan a thiam ve dan a nih tur thu contractor a hrilh.

CYMA vice president Prof. Lalnuntluanga hoin CYMA hruaitu eng emaw zatin NHIDCL hnuaia short term maintenance contract (SMTC) Vairengte aṭanga Sairang inkar siam mek an enfiah a; contractor-te hnathawh mek chu a lungawithlak loh hleah an ngai tih an sawi.

CYMA tarlan danin, Vairengte aṭanga Sairang inkar hi NHIDCL hnuaiah contractor pathumin open tender-a chhangin July 2025-ah an thawk ṭan a, July 2026-a thawh zawh tur a ni. Tun thlengin an thawh tur ang zatve an la thawk lo vek.

NHIDCL hotute leh contractor-te chu nakkum fûr ruahtui thlak hma ngeia an hna zo vek turin CYMA hruaitute chuan an hrilh a; kawng siam chu an vil zui zel tur thu an sawi.

CYMA hruaitute chuan November 8, 2025-a an kal hmasak ai chuan kawng siamtute'n hna an lo thawk ve viau tih an hmu a, chak lehzuala hna thawk turin contractor-te an hrilh. Vawiin aṭangin Sairang lam aṭanga hna thawk tan ve nghal turin Jain Infratech Co. hotute an chah bawk.