Agriculture Minister-in leiṭha a vailiam; Kuminah leiṭha ip 5,724 man a ni tawh

Agriculture & Farmers Welfare minister PC Vanlalruata chuan December 6, Inrinni khan Ch. Saprawnga Truck Terminal, Rangvamual aṭangin leiṭha (fertilizer) chi hrang hrang ṭhahnem tak a vailiam. Minister chuan, kumin chhungin dan loa hralh tur leiṭha ip 5,724 man a nih tawh thu a sawi.

Minister PC Vanlalruata'n leiṭha a vailiamte hi MAHFED kaltlanga loneitute hnena hralh tur a ni a, urea ip 11,200, TSP ip 1,800 leh MOP ip 1,000 a ni.

Agriculture Minister chuan, sorkar laipui aṭanga Mizoram quota leiṭhate chu loneitute'n a man dik tak (MRP)-a an lei theih nan leh hnianghnar taka an hmuh theih nan sorkarin theihtawp a chhuah thu a sawi a, "Ram danga dan loa fertilizer thawn chhuah ṭhin titawp turin nasa taka hmalak mek a ni," a ti.

Dan loa leiṭha thawn chhuak ṭhinte district hrang hranga fertilizer inspector, police leh magistrate-te nen ṭanghoin uluk taka vil an nih thu sawiin PC Vanlalruata chuan, "Kumin 2025 chhung hian dan loa sumdawnna atana leiṭha hman tur leiṭha ip 5,724 man a ni tawh," a ti a, leiṭha mante chu urea ip 5,424 leh DAP ip 300 a nih tawh thu a sawi.

PC Vanlalruata chuan, sorkar laipui thuchhuak angin Mizoramin AFW department kaltlangin thlai chinna ram zau zawng mil leh thlai chinna leilunga thlai chaw awm (soil fertility) milin sorkar laipuiah report an thehluh ṭhin thu a sawi a, "Report kan pek angin kum tin sorkar laipui aṭangin Mizoram chanvo tur leiṭhate loneitute'n tlâwm taka an lei theih tura dawn ṭhin a ni," a ti.

Agriculture Minister chuan, India ram chu mihring tamna ber a nih avangin buh leh bal mamawh a sang hle tih sawiin, "Thlai chinna leilung a dâk tawh avangin buh leh bâl thar hi kum tin a tlahniam zel. Loneitute'n thlai tam zawk an thar theih nan lei tihṭhatna hman a ngai. Fertilizer hi man to tak, loneitute'n an lei phâk loh a nih avangin tlâwm taka an lei theih nan sorkar laipui chuan kum 1957 khan ruahmanna thar a siam," a ti a; fertlizer siamtu company-te hnenah a siam man sorkar laipuiin 90% dáwn a pek thu a sawi.

Sorkar thuchhuah tarlan danin, Mizoram State Agriculture, Horticulture and Marketing Cooperative Federation (MAHFED) kaltlang chauhin Mizorama loneitute hnenah leiṭha hralh phal a ni a; Minister-in leiṭha a vailiamte hi MAHFED hnuaia zawrh tur a ni.