Indona vanga thi leh hliamte hnenah state sorkarin Rs 15,00,000 a pe tawh

Nimin December 7 kha Armed Forces Flag Day a ni a; he ni pual hian Governor Gen. Dr Vijay Kumar Singh chuan thuchah tichhuakin, sorkar kum kal ta leh kal mekah Mizoram sorkarin indona vanga thi leh hliam chhungte hnenah Rs 15,00,000 a pek tawh thu a sawi.

Governor chuan, Mizorama sipai báng (ex-servicemen)-te chibai bûkin, ram venhim hna an thawh tawhnaah lawmthu a sawi a, "He ni hi hma lam hun duhawm tak kan neih theih nana an theihna zawng zawng hlantute zahna lantira kan hriatreng theih nana ruahman a ni," a ti a; India ram leilung, tuipui leh van boruakte ngawrh taka venghimtu Indian Armed Force-te zarah khua leh tuite ralmuang takin an mut theih phah ṭhin tih a sawi.

Indian armed force mi leh sa Mizoramin a chher chhuah ṭha tak tak an awm tawh thu sawiin Larsap chuan, "Lt Col. Clement Lalhmingthanga leh petty officer TBC Lalvenchhunga te chu 9th Legislative Assembly of Mizoram member an ni mek a, Capt. Lalrinawma Sailo, 4th Para (Special Forces) chuan August 15, 2025 khan sipai huaisen chawimawina Kirti Chakra a dawng a, chhuanawm ka ti tak zet," a ti a; Mizoram ṭhalaite chu Indian armed force zawm tura theihna an neihzia lantir turin a sáwm.

Gen. VK Singh chuan, Mizo ṭhalaite'n theihna leh chakna an ngah tih a hriat thu sawiin, "Armed forces zawmtute'n hlawhtlinna duhawm tak an chan ngei ka ring tlat. Mizoram sorkarin ral dona vanga sipai thi chhungte leh ramtuileiloa awm zuite a tuamhlâwm ṭhin a, sorkar kum kal ta leh kal mekah Mizoram sorkarin indona vanga thi leh hliam chhungte hnenah Rs 15,00,000 a sem tawh," a ti.

Sorkar kum kal ta leh kal mekah hian ex-servicemen leh an chhungte mi 23 - dam lohna vanga inenkawl ngai mi 16 leh khuarel chhiatna tawk mi pasaihte hnenah ṭanpuina Rs 91,500 pek a nih thu Larsap chuan a sawi bawk.

Armed Forces Flag Day pual hian Mizoramah sipai bangte leh an chhungte ṭanpui nan vehbûr khawn a ni ṭhin a; sum lutte chu sipai bángte leh an chhungte damloh nikhuaa inenkawlna senso atan te, khuarel chhiatna tâwkte chhawmdawlna leh sipai báng hamṭhatna tur atante hman ṭhin a ni.