Sorkar ngêlnghet awm duh vangin LADC-a candidate-te an ko khawm

Lawngtlai District NGO Coordination Committee chuan December 6, Inrinni khan LADC inthlan vote thlak zawh taka MDC candidate-te chu CYLA pisaah an kawm a; an inkoh khawm chhan chu LADC-ah sorkar ngêlnghet a awm an duh vang a ni.

Lawngtlai NGOCC chairman F Lalrothanga, CYLA president chuan, LADC inthlana vote tlate December 9, 2025-ah chhiar a ni dawn tih sawiin, "Rei lo teah sorkar thar a piang dawn. Party mala sorkar emaw, thawh dunna leh thawhhona aṭanga sorkar siam pawh ni se, ram mipuiten sorkar ngêlnghet kan mamawh," a ti a; result hriat hmain ram leh mipui dinhmun ngun taka thlir turin MDC candidate-te a ngen.

F Lalrothanga chuan, hnam ziarâng, ṭawng leh culture vawnhim leh hmasawnna atana hmalak chu sorkarin tih ngei tura an ngaih thu sawiin, "Sorkara chanvo pawimawh zual, CEM, chairman, deputy chairman leh department pawimawh zual, ram leh hnam hnuk khawih nasa bik - Education, Forest, Revenue leh Art & Culture department-te chu ADC hming put chhante enkawlna hnuaia a awm kan duh ber," a ti.

NGO Coordination Committee leh candidate-te inkawmnaah hian, sorkar indin dan emaw, sorkar kal danah emaw mipui mit tikham zawnga chêtna a awm a nih chuan NGOCC-in hma an lak tur thu sawi a ni.