Seniority aiin efficiency ngaih pawimawh a ni dawn, Officer-te tan training uar a ni ang - DPAR Minister

Department of Personnel and Administrative Reforms (DPAR) minister K Sapdanga chuan, sorkarin seniority aiin efficiency a ngaih pawimawh zawk dawn thu a sawi a, "Senior officer-te tan tam zawka training buatsaih tum a ni a, transfer and posting chungchangah 'the right man in the right post' ngaih pawimawh a ni dawn," a ti.

DPAR Minister hian nimin khan Aijal Club-a Mizoram Finance & Account Service Association (MFASA) Annual Conference a hmanpui a; "Hmasawnna tak tak nei tur chuan India ram pawn thlenga tlangnêl ngam tura intuai hriam tura training uar a ngai," tiin, nuam tihna hmun zîm tê aṭanga tâl chhuah ngam a ṭul thu a sawi.

Thawh chhuah nei chau tak, mamawh ngah viau siin hun bik nei development project-te a huna thawh zawh hman loh an ngah thu sawiin K Sapdanga chuan, "A chhan chhui chhuaka titawp turin ṭan kan lak thar a ngai," a ti a; hun bawhpelha pawi theiah sum pek chhuah ngai pawimawh ṭhin turin MFAS-te a chah.

K Sapdanga chuan, kawngpui siamna tur sum chu a hun laia pek a nih loh chuan, a hnua pekin awmzia a neih tawh loh theih thu sawiin, "General Financial Rules leh Central Treasury Rules te bawhchhe chuang loa her rem a ngaih châng a awm tih hriat a pawimawh. Kalphung thar sorkarah chuan dik si, rang si, him si, rin tlâk bawk si kan mamawh," a ti.

Department inkara dik zawk nih inchuh vanga development work-in a hnufûm phah fo chu tàwp tawh se a duh thu sawiin Minister chuan, "Phone-a chinfel theih ni si, file return awm ṭhin hi hna tihkhawtlai luih tumna a ni," a ti a, disciplinary action lakna tham a nih thu a sawi.

K Sapdanga chuan, Mizoramin development fund a hmuhna tam ber chu rulh leh ngai chi, 'dept financing' a la nih thu sawiin, "Hei hian nakin lawkah leiba phurrit a siam theih avangin titlem tial tial a, thawh chhuah tipung a, hmasawnna hna thawh dan kawng dap turin MFAS officer-te ka sawm che u. Technology chhuak thar apiang ûm phâk turin senior officer-te tan training ṭha zawk neih dan tur sorkarin a ruahman," a ti.

DPAR Minister chuan, sorkar pisaa bio-metric attendance leh KAI application te chuan hun vawn dik kawngah hmasawnna a thlen tih sawiin, "Khawl vanga dan zawm hi lungawipui mai loin, thinlung taka duhna vanga dan zawm hun a la thlen beisei ila," a ti a; mahni inthununna leh hnathawh kalphung ṭha an neih chuan Mizoram chu model state-ah an siam theih thu a sawi bawk.

MFASA Annual Conference hi an president Vanlalsawma'n a kaihruai a; DPAR Minister hian MFAS Directory 2025 a tlangzarh.

Chawhnu lamah ro an rel a; an rorel zingah, sorkarin Mizoram pension (OPS) reforms chak takin kalpui rawh se, tih te, financial management chungchangah workshop buatsaih ni rawh se tih leh, audit training - C&AG/PAG ah neih ni rawh se tihte a tel.