KHAWTHLIR

Synod Inkhawmpui

Zanin hian Zarkawt Kohhran biak-inah Synod Inkhawmpui vawi 102-na ṭan a ni dawn. Naktuk Nilaini aṭanga December 13, Inrinni thleng chhun lamah rorel a ni ang a, December 14, Pathianni zanah a ṭiak ang. Kumina Synod inkhawmpui thupui chu 'Chhuan tur dik' tih a ni.

Micro-ATM sem

Cooperation department secretary Udit Prakash Rai chuan nimin khan Mizoram State Cooperative Union conference hall, Aizawlah Apex Bank Micro-ATM chu banking correspondent mi 30 hnenah a sem. Micro-ATM hi bank nena khawl inthlun zawm a ni a, bank awm lohna khuate tana pawisa dah leh lak chhuah theihna a ni.

Heroin hâl ral

Lunglei District Disposal Committee chuan nimin tlai khan Lunglei AP Tlanga incinerator-ah Lunglei SP J Lalmuankima hoin heroin gram 176.15 an hâl ral. Heroin hâl ral takte hi Lunglei Judicial Magistrate First Class I-in a rel anga hâl a ni a, cheng nuai 5.28 hû a ni.

Vote chhiar dawn

Vawiin hian Lai Autonomous District Council (LADC) inthlanpuia vote tlate Lawngtlai College-ah chhiar a ni dawn. December 3, 2025-a LADC inthlan vote chhiar hi zing dar 8-ah ṭan a ni dawn a, hmun pathumah chhiar tur niin, ṭum khatah bial pathum zel chhiar a ni ang. LADC-ah hian MDC bial 25 a awm a ni.

Hnawksak theia ui vulh khap

Serchhip district magistrate Paul L Khuma chuan thupek chhuahin, Serchhip district-ah mi dang tana harsatna siam zawng leh hnawksak theia ui vulh khap a nih thu a tarlang. Magistrate chuan, "Ui vulhtute'n khawlaiah ui an chhuah zalen tur a ni lo a, khawlaia an chhuahpui dawnin hrui rinawm ṭha taka thlungin an kai ngei tur a ni. Ui zun leh ek khawlaiah hnutchhiah loh tur a ni," a ti.