Kum 5 chhungin hectare 11,500-ah ṭhelrêt chîn khah vek kan tum - CM

Chief minister Lalduhoma chuan nimin khan Chuhvel khuaa ṭhelret chingtute huan panna kawng a hawng a; kum 5 chhungin ram hectare 11,500-a zauah ṭhelrêt chìn khah vek tum a nih thu a sawi.

CM Lalduhoma chuan, sorkarna an chelh hnu rei lo têah a pisaah India Rubber Board chairman Dr Shawar Dhanania nen an inkawm thu a sawi a, "Tripura state-in CM Rubber Missions an kalpui dante kan sawi dun a, Mizorama kalpui ve a ṭhat thu te, a ṭul anga Rubber Board-in min thawhpui an inhuam thute min hrilh," a ti.

Tripura-a an kalpui dan zir chiangtu tur mithiam an tirh thu sawiin Lalduhoma chuan, "December 16, 2024 khan Mizoram Chief Minister Rubber Missions kan hawng. He Missions hnuaiah hian kum 5 chhungin hectare 11,500-a zauah rubber chìn khah vek tum kan tum dawn," a ti a; hna thawhna tur cheng vbc 27.98 NABARD aṭanga an dawn thu a sawi.

Chief Minister chuan, department chhinchhiah danin, Mizoram bikah ṭhelrêt kung puitling pakhat aṭangin kum 1 chhungin ṭhelrêt hnái kg 2-4 inkar a haw thei tih a sawi a, "Hectare 1-a zauah a tlangpuiin kg 1,000-2,000 vel kum khat chhungin a thar theih tihna a ni. Tunlai market rate anga chhutin hectare 1-a zauah Rs 1,80,000 aṭanga Rs 3,60,000 vel a lak luh theih," a ti.

Chuhvela ṭhelrêt chingtute huan panna kawng hawnnaah hian Land Resources, Soil and Water Conservation minister Lalthansanga leh bialtu MLA Lalfamkima, deputy speaker te pawh an tel.

Chuhvelah hian CM Rubber Missions phase 1 hnuaiah chhungkua 80 an awm a, July 2025 khan chhungkaw tinin ṭhelrêt kûng 450 ṭheuh an dawng. Ṭhelrêt phunna atana mamawha hman turin Rs 40,320 an dawng nghal a, November 2025 khan second instalment Rs 20,160 an dawng leh bawk.

Kawng hawn tâk hi May 2025 khan laih zawh a ni a, km. km 7.5-a thui niin, cheng nuai 18.9 sen a ni. Kawng siamna sum hi huan neitute'n an pawisa dawn aṭanga an thawh khawm a ni a, kawng hian ṭhelret huan 80 a pawh vek a ni.