MSU-in dan loa khaw din endik dawn

Mizo Students’ Union (MSU) chuan Mizorama dan loa khaw din (unauthorised settlement)-te a hmunah an enfiah dawn a, endik tura kal turte chuan nimin khan Aizawl an chhuahsan.

RTI Act hmanga zawhna Local Administration Department-in kumin April thlaa an chhan danin, tun dinhmunah Mizoramah dan loa din khaw 11 a awm mek tih MSU chuan an tarlang.

MSU chuan, Mizorama dan loa khaw din awm mekte chu kumin 2025 chhung ngeia tihtawp a nih theih nan hma la turin Mizoram sorkar an ngen tawh tih an tarlang a, "Dan loa khaw dinahte hian sorkar development (school, power supply, health, water supply, etc) a awm em tih leh tute nge cheng tih enfiah a ni dawn," an ti.

Dan loa khaw din endik tura kal MSU General Headquarters hruaitute hi MSU Regional Head-quarters, Lunglei hruaitute'n an lo ṭawiawm dawn a ni.