BRO project thar 125 zingah Mizorama thawh tur 3 a tel

Union Defence minister Rajnath Singh chuan December 7, Pathianni khan D-S-DBO Road, Ladakh-ah online-in Border Roads Organisation (BRO) hnuaia ramri hrûl hmun kilkhawrte nena inpawhna ṭha zawk siamna tur infrastructure project 125 a hawng a, chu'ng zingah chuan Mizorama hna thawh tur pathum a tel.

Rajnath Singh-a'n BRO project a hawnte hi kawngpui 28, lei 93 leh a dang pali a ni a; hawnna inkhawm hi Lok Sabha MP Richard Vanlalhmangaiha, Rajya Sabha MP K Vanlalvena leh Project Pushpak (GREF) chief engineer Rajeev Dua ten online-in an chhim.

BRO project 125 zinga Project Pushpak, Aizawl hnuaia Mizorama hmalakna turte chu - Zawlingling-Mawhre-Sapi (Z-M-S) kawng km. 38.150-a thui (km 30 - 38.150) siam te, Lawngtlai-Diltlang-Parva kawnga Tuichang lei dawh te, he kawng veka Gausan bridge dawh turte a ni.