January 16-ah Covid-19 vaccine Mizoramah pek ṭan a ni dawn

Covid-19 laka invênna damdawi (vaccine) chu January 16, tun kar Inrinniah India ram pumah pek chhuah ṭan a ni dawn a, Mizoramah pawh pek ṭan nghal tura ruahman niin, hmun pali-ah pek chhuah a ni ang. 

National Health Mission (NHM) mission director Dr Eric Zomawia chuan zawhna chhángin, Covid-19 vaccine pek chhuah hna chu sorkar laipuiin inkaihhruaina a siam anga kalpui a nih dawn thu a sawi a, "Vaccine hi tun kar chhungin a rawn thlen hman beisei a ni," a ti.

Dr Eric Zomawia chuan, vaccine pek chhuah hmasak tur pawh thlan fel vek an nih tawh thu te, database lâk khawm vek a ni tawh a, national portal-ah dah luh vek a nih tawh thu te, vaccine chungchangah sorkar laipui hotute nen ni tinin an inbiak-pawh reng thute a sawi bawk. 

NHM Mission Director sawi danin, Covid-19 vaccine pek chhuahna tur hian Aizawl district-ah hmun pathum ruahman a ni a, chungte chu - Aizawl Civil Hospital, Kuli­kawna Sub-District Hospi­tal leh ITI Venga Urban Primary Health Centre-te a ni. Lunglei-ah hmun pakhat - Civil Hospi­tal, Lunglei ruahman a ni bawk.

Sorkar laipui chuan January 16, 2021 aṭangin Covid-19 vaccine pek chhuah a nih tur thu a lo puang tawh a; damlo enkawlna kawnga thawktu (healthcare worker)-te leh hripui donaa a hmatáwnga thawk (frontline worker) mi nuai 300 vel pek hmasak an ni ang. Chumi hnuah kum 50 chung lamte leh kum 50 hnuai lam zinga natna benvawn nei mi nuai 2700 vel pek leh tum a ni. 

Covid-19 vaccine pekna tur hian Mizoramah State Steering Committee, State Task Force, District Task Force leh Block Task Force on Covid Vaccine din a ni tawh.

Covid-19 vaccine pek dan tur ngaihtuahtu State Task Force for Covid-19 Vaccination chu nimin khan an chairman H Lalengmawia, Health secretary hoin SAD conference hall-ah an ṭhukhawm a; vaccine pek dan turte an sawiho.

Ṭhutkhawma tarlan danin, Mizoramah chuan healthcare worker-te'n vaccine an dawng hmasa dawn a, dawng hmasa turin database-ah mi 14,421 thun luh tawh niin, chu'ngte chu Mizoram sorkar hnuaia healthcare worker mi 14,107 leh sorkar laipui hnuaia health­care worker mi 314 an ni. 

Mi 14,421 zingah hian doctor leh nurse bakah, damdawi-ina thawktu hrang hrangte leh ambulance driver-te an tel a; tun January thlaa ni 9 chhungin Mizoramah ni tin mi 880 hnenah hri danna pek tura ruahman a ni.

Mizorama Covid-19 vaccine pek tur chu Serum Institute of India siam Covishield a ni a, a thawh khatna atan vaccine 18,500 dawn niin, chu'ng zinga 1,850 (10%) chu thlavéng atan dahṭhat a ni ang.

Vaccine rawn thleng hmasa hi dose hnih tur a nih avangin a thawh khatnaah hian health­care worker mi 8,325-in an dawng thei dawn a, sorkar laipui­in database kaltlanga an bithliah hoin a tahtawlin an dawng zui zel dawn a ni.