Aizawl Municipal Corporation inthlana Congress candidate turte an puang

Mizoram Pradesh Congress Committee (MPCC) chuan nimin khan Lal Thanhawla Auditorium-ah kumin atan an party pisa hawn inkhawm an buatsaih a; Aizawl Municipal Corporation (AMC) inthlana an party candidate turte an puang nghal. Ward tinah candidate an nei dawn a; ward no. III, VIII, X, XIV, XVI leh XIX-te chu hmeichhe tana hauh a ni.

AMC-a Congress candidate zingah hian councillor ni lai pathum - Rosiamngheta, H Vanlalruata leh Zodingpuii te an tel a, an ward ngaiah ṭheuh an ding dawn. Zodingpuii hi kum 2015-a inthlanah hmeichhe tana seat hauhah thlan tlin a ni a, inthlan awm leh turah erawh a dinna tur chu general ward/ seat a ni tawh ang.

Candidate-te puangtu MPCC president Lal Thanhawla chuan, ram sum leh pái enkawlna kawngah Congress sorkar chu an che ṭha thawkhat viau nia sawiin, "Sorkar hnathawk hlawh pûksak kan nei ngai lo a, GPF, pension leh bill hrang hrang kan pe thei zel. MNF sorkar thar pawh hna thawhna tur cheng vaibelchhe tam tak kan hnutchhiah a ni," a ti.

Lal Thanhawla chuan, MNF sorkarin kum hnih chhungin Mizoram sum leh pai dinhmun an tichhe vek nia sawiin, "Chief Minister berin pawisa a tam thu a sawi reng chungin sorkar hnathawk hlawh an pûksak a, GPF lâk theih a ni lo a, pension-te'n pawisa chhuahpui tur an nei lo a, contractor-te bill tam tak a táng mek a ni," a ti a; Pathian zara Congress an sorkar leh chuan sum dinhmun an siamṭhat tur thu a sawi. 

MPCC treasurer Zodintluanga Ralte pawhin thu sawiin, MNF sorkar laiin AMC Act siam a nih thu a sawi a, "Mahse, an sorkar chhungin hman an tum lo. Sorkarna kan chan hnuah an dan siama a ṭha lo lai siamṭhain hman a ni. AMC hi thuneihna sang tak pek chhoh zel a ni a, la pek belh zel tur tam tak a awm. MNF sorkar hnuah thuneihna pek belh a awm lo a, kan tih sa an ring," a ti. 

Zodintluanga Ralte chuan, AMC chu Aizawl khawpui enkawltu pawimawh tak a nih thu sawiin, "Hetih lai hian, Covid-19 avanga inkaihhruaina hrang hrang Aizawl khawpui chhung tana siamah AMC an ráwn ngai lo. AMC-a MNF sorkar lahin mipui tana harsatna tur hlirin hma an la a ni," a ti a; AMC-ah sorkarna Congress-in an siam chuan thil ṭha, mipui zângkhaina tur si an duan tur thu a sawi.

MNF sorkar hnuaiah AMC Mayor leh a thawhpuite chu eng mah ti thei loa siam an nih thu sawiin Zodintluanga chuan, "AMC-ah hian MNF an sorkar leh chuan eng mah an ti thei leh dawn lo. AMC hian Assembly House-a dan pass thlap hmangin tih tur chin tam tak an nei. Sorkarna kan chan chuan kan fight dawn a, chumi atan chuan Congress hi kan sorkar a ngai a ni," a ti.

MPCC Treasurer chuan, central lama BJP-in Kristiante nêkchêpna atan Pathianni curfew an duh tih sawiin, "MNF sorkar hian Thawhṭanni aṭanga Inrinni thleng min chhuah zalên a, Pathianniah min chhuah phal lo," a ti a; central BJP duh dan anga Pathiannia inkhawm lo tura ruahmanna siamah MNF sorkar a puh.

Congress party thuchhuah tarlan danin, inkhawmah hian MPCC President-in Congress party-ah mi 103 a lawm lut a ni.