KHAWTHLIR

Nimin khan Siaha leh Kolasibah an district-a sorkar department hrang hrang hotute leh tlawmngai pawl hruaitute'n kumina Republic Day lawm dan tur an rél. Kolasibah chuan Republic Day chu DC pisa tual záwla hman turin an rél a, sikul naupang aṭangin parade contingent awm lo turin an ti a ni. Siaha-ah chuan head of office-te nen chauha hman a ni dawn.

State Referral Hospital-ah nimin khan Covid-19 vei mi pakhat dah luh a ni a, ani nen SRH-ah hian hripui vei vangin mi 17 enkawl mek an ni. SRH-ZMC Bulletin tarlan danin, mi 17-te chu Isolation ward-ah an awm a, ngaihtuahawm lutuk an awm loh rualin, mi panga chu oxygen pek an ni. SRH-a enkawl mek zingah hian kum 60 chung lam mi pathum an tel a, naupang an awm lo.

Zo Re-unification Organisation (ZORO) chuan nimin khan an pisa hawnna inkhawm an buatsaih a, executive committee meeting an nei nghal. ZORO president R Sangkawia chuan, ZORO chu khawvel hmun hrang hranga awm Zofa chi péng hrang hrangte insuihkhawm a, rorelna pakhat hnuaia a awm theih nana beitu a nih thu a sawi.

Mizoram Underground Returnee Association (MURA) chuan thuchhuah siamin, Land Revenue & Settlement minister Lalruatkima hmalakna avangin MURA member, in leh lo nghet la nei lote tan hmun ṭha tak Tuivamit ramah Mizoram sorkarin a pe chu lawmawm an tih thu an tarlang. "Kan returnee pui Ex-MNA leh PAMRA-te'n theihtawp min chhuahpui avangin kan lawm em em a ni," an ti bawk.

Serchhip bawrhsap Kumar Abhishek hoin nimin khan DC meeting room-ah Serchhip district-a Covid-19 laka invênna (vaccine) pek dan tur sawiho a ni a, additional DC Lalmuansanga Ralte bakah, District Task Force member-te an tel. Kumar Abhishek chuan, Covid-19 vaccine pek chhuahna turah thawktute chu theihtawpa inbuatsaih turin a ngen a; Serchhip chief medical officer  Laldawngliana Sailo chuan vaccine pek chhuah dan tura inbuatsaihna leh ruahmanna kalpui dante a sawi a ni.