COVID-19: Mizoram dinhmun Hripui vei mi 6 hmuh belh a ni

January 11, Thawh­ṭanni khan Mizoramah Covid-19 vei mi paruk hmuh chhuah a ni a, an zingah tualchhunga kái mi pahnih an tel a, natna (symptom) lang an awm lo. Nimin khan hripui laka fihlîm tawh mi panga chhuahtir an ni thung.

Covid-19 vei hmuh chhuah tharte chu mipa pali leh hmeichhia pahnih an ni a; ZMC laboratory-ah leh TrueNAT-PCR hmangin mi pathum ve ve hmuh chhuah a ni. Rapid Antigen Test (RAT) hmangin district pariatah swab sample endik ni mah se, hripui vei hmuh chhuah a ni lo.

Nimin khan hripui laka fihlim tawh mi panga chu enkawlna hmun aṭangin chhuahtir an ni a; SRH-ZMC aṭangin mi pali leh Lawngtlai CCC aṭangin mi pakhat an chhuak a ni. 

Mizorama Covid-19 vei hmuh chhuah tawh chu mi 4,299 an ni a, mipa 3,152 leh hmeichhia 1,147 an ni. Nimin tlai dar 5 thleng khan damin mi 4,199 (97.67%) chhuahtir an ni tawh a, mi pakua (0.21%) thi tawhin, enkawl mek mi 91 (2.12%) an awm. 

Mizorama district 11 zinga panga - Siaha, Champhai, Mamit, Khawzawl leh Hnahthial district-ahte Covid-19 vei an awm rih lo.

January 11, Thawhṭanni khan ZMC laboratory-ah swab sample 520, TrucNAT-PCR hmangin district pasarihah sample 123 leh RAT hmangin district pariatah sample 378 endik a ni a; sample endik zawng zawng chu 1,021 niin, chuta ṭanga Covid-19 vei hmuh chhuah mi paruk chu 0.59% a ni.

Sorkar thuchhuah tarlan danin, ZMC laboratory-a RT-PCR hmanga Covid-19 positive hmuh chhuahte chu Aizawl district-a swab sample lâk vek an ni a, mipa pakhat leh hmeichhia pahnih niin, naupang kum 9 leh kum 10 mi pakhat ve ve a tel. Mizoram chhunga hri kái Mizo pakhat leh tun hnaia state páwn aṭanga rawn lut pahnih, hnam dang ve ve an ni.

TrueNAT-PCR hmanga hripui vei hmuh chhuahte chu mipa kum 31-40 inkar, hnam dang vek an ni a, Covid-19 symptom nei an awm lo. Pakhat chu Mizoram chhunga hri kái a ni a, pahnih dang chu tun hnaia state páwn aṭanga rawn an ni thung.

Mizoramah swab sample 1,88,100 endik a ni tawh a, chu'ng aṭang chuan Covid-19 positive mi 4,299 hmuh chhuah niin, endik zat aṭangin 2.29% a tling.

Covid-19 vei hmuh chhuah tawh mi 4,299 zinga mi 2,038 chu Mizoram chhunga kái chhâwng an ni a; mi 2,261 chu Mizoram páwn aṭanga an rawn luh hnua hmuh chhuah an ni.

Maubawk - 1: Hmeichhia kum 10, tualchhunga kái, kàina hriat, home quarantine lai, symptom nei lo.

Assam Rifles - 2: Mipa kum 45 leh hmeichhia kum 9; 46 Assam Rifles mi leh sa, tun hnaia state pawn aṭanga rawn lut, quarantine facility-a awm mek, symptom nei lo ve ve.

Border Security Force - 1: Mipa kum 31, Lungleia awm 199 Bn BSF mi leh sa, Mizoram chhunga hri kái, quarantine facility-a awm mek.

NEEPCO - 2: Mipa kum 36 & 40, Tuirial Hydro Electric Power Project siamtu NEEPCO hnuaia thawk, tun hnaia Assam aṭanga rawn lut, anmahni hmuna inkhung mek.