Kalphung thar vuantu kan ni - ZPM President

Zoram Peoples' Movement (ZPM) chuan nimin khan kumin atana an party pisa an hawng ṭan a; hawnna inkhawmah an president Lalliansawta chuan, ZPM chu kalphung thar vuantute an nih thu a sawi.

Pisa hawn inkhawm hi ZPM vice president Kenneth Chawngliana'n a kaihruai a; Lalliansawta chuan, "Kalphung thar vuantute kan ni a, kan chêtzia leh awm danah chu chu kan tihlan a ngai. Ram rorelnaa Pathian ram din turin theihtawp i chhuah ang u," tiin, an party mi leh sa Zoram hmun hrang hranga mite kum thar chibai a bûk.

ZPM pisa hawnna inkhawmah hian MPF general secretary Rev. R Lalnuntluanga'n hunserh a hmang. ZPM thuchhuah chuan, ZPM leader Lal­duhoma'n an party zawm thar mi 361 a lawm lût nghal tih an tarlang.