Hri léng karah Pathian malsawm tlâkin sorkarin hna a thawk - MNF Vice President

MNF party chuan an pisa Mizo Hnam Rûn chu kumin chhung atan nimin khan an hawng ṭan a; hawnna inkhawmah MNF vice president Lalthleng­liana chuan, hri léng karah Pathian malsawm tlakin Mizoram sorkarin hna a thawk niin a sawi.

Lalthlengliana chuan, kum 2020-ah Covid-19 avangin harsatna nasa tak sorkarin a tâwk tih sawiin, "Hri léng karah Pathian malsawm tlakin Mizoram sorkarin hna a thawk a, opposition party-te pawhin Covid-19 do nan an theihtawp an chhuah tláng a, an chungah lawmthu kan sawi a ni. India ram hian Covid-19 donaa thawk ṭha ber state thlang dawn se la, Mizoram hi India ramah pakhatna kan ni ngei ang," a ti.

Chief Minister kaih­hruaina chung­changah Lalthlengliana chuan, "Kan CM hian hma a la thiam a, thawhpui tlakin hna a thawk. Health, Supply, Social Welfare leh department dang pawhin theihtawp an chhuah rah kan chang mek zel a ni,: a ti a; harsatna karah buhfai tlachham loin Mizoram a awm zel thu a sawi. 

MNF Vice President chuan, India ram hmun dangah CM Relief Fund chu mi dang kutah an dah ngai lo nia sawiin, "Kan CM chuan board dinin, chu mite kutah chuan transparent takin kalpui a ni," a ti a; CMRF chu a hman danah a tìrah zawhna awm neuh neuh mah se, tunah chuan sawi leh zâwt peih an awm tawh lo nia sawiin, "Hetianga CMRF phalrai hi India ramah kan CM lo chu pakhat mah an awm lo," a ti.

Inthlan chungchang sawiin Lalthlengliana chuan, LADC inthlanah MNF-in a tawn ngai loh chakna an chang nasa tih a sawi a, "He hnam hi Pathianin a thlang a, harsatna a tawh apiangin MNF hi a thlang zel a ni. Lalpa'n a thlan kan ni," tiin, MNF chu 'Pathian leh kan ram tan' titute an nih thu a sawi.

AMC inthlan leh Serchhip biala Assembly by-election neih tur chungchangah MNF Vice President chuan, "February thlaah AMC kan inthlang leh dawn a, candidate puan la ni lo mahse green signal pek vek tawh an ni a, an ṭha ṭheh ṭhawh hle. AMC-ah pawh kan sorkar leh dawn a ni. Serchhip biala by-election-ah pawh kan chak ngei dawn," a ti.

Mizo Hnam Rûn hawnna inkhawm hi MNF vice president Vanlalzawma'n a kaihruai a; treasurer K Vanlalauva pawhin thu a sawi a ni.