Sem policy hi Mizoram tichhetu a ni - Lalduhoma

Zoram People's Movement (ZPM) leader Lalduhoma chuan, 'Sem policy' chu rilru leh thlarau thlenga piansualtirtu a nih thu leh Mizoram tichhetu a nih thu a sawi.

Nimina ZPM pisa hawnna inkhawmah Lalduhoma chuan, sem policy chu Congress party-in vawi li leh MNF-in vawi thum an tlinpui tawh thu a sawi rualin Mizoram a tihchhiat thu a sawi a, "Kan hruaitu hmasa Pu Ch. Chhunga leh Brig. T Sailo-te khan sem policy an sawi ri ve ngai lo. Mizoram politics-a sem policy tichhuaktu chu Congress party an ni," a ti.

Lalduhoma sawi danin, kum 1989-1998 chhungin Congress party-in NLUP hnuaiah Rs. 30,000 sem an zuar a, an tlinpui a; chu chu MNF-in hriain kum 1998 inthlanah MIP hnuaia Rs. 50,000 sem policy an tlinpui a ni. Kum 2008 inthlanah Congress-in NLUP Rs. 1,00,000 zuar lehin, an tlinpui leh a; kum 2018 inthlanah MNF-in SEDP hnuaiah Rs. 3,00,000 sem an tling pui leh bawk. Sem policy hnuaiah Mizoram chu kum 34 vel a awm tawh a ni.

Congress leh MNF party-te chuan an mihringpuite chu ran leh bungrua ang maiin an lilám tih sawiin Lalduhoma chuan, "A chháng huai zawk apiang an tlin zel avangin an zawngchhang a, an inlàn chho zel a, a ngawl an vei tawh a, an sim thei tawh lo,'' a ti.

ZPM Leader chuan, sum sem first instalment dawngin a dawt leh an thlír a, a la dawng lote'n dawn ve hun an nghâk ṭhin tih sawiin, "Valambawk ûm ang maiin min siam a, an intiam ang dawn ní erawh a her chhuak ngai lo. He politik aiáwtah hian piantharna da ṭhakin min tàntir a, patling zet mahni leh mahni pawh inthurual hlei thei loin, mahni zalenna leh duhthlannate hmang ngam loin min siam a ni," a ti. Sem policy chu rilru leh thlarau thlenga piansualtirtu, kohhranin an do leh Bible zirtirna kalh a nih thu a sawi.

Political party ṭhenkhatte'n sem policy an tlinpui ṭhin tih ZPM-in an hai lo tih sawiin Lalduhoma chuan, "Ti ve mai tura nawrna pawh kan tâwk fo. Pathian zarah chu thlèmna chu tun thleng hian kan la do zo a, kan do zel dawn," a ti.

Lalduhoma chuan, "Kan policy - 'Kalphung thar, Mipui sorkar' hi kan tlûkpui ngam a, kan dinpui ngam bawk a ni," a ti a; dikna, huaisenna, tumruhna, taimâkna leh thawhrimna chauh chu Mizoram dinchhuahna tur a nih avangin 'Hand holding policy' hmangin mahni kea ding thei tura mipui kaihhruai an tum thu a sawi a ni.