YMA kumpuan 'Ruihhlo Do' hawn a ni

December 10, Nilaini zan khan kum 2025-2027 chhunga YMA kumpuan 'Ruihhlo do' chu Vanapa Hall-ah Central YMA president R Lalngheta'n a hawng.

CYMA President chuan, December 10 zan aṭangin khawlaia thle mai mai, riahna tur ṭha nei loteah CYMA Kumpuan Committee-in hma an lak ṭan thu a sawi a, "ṬBCC-ah dah thlak ṭan leh a ni ang. Ruihhlo do hi a sâwt tih a takin ka hria a, pafa inbe thei tawh lo te, inngai taka an han awmho lehte hmuh hian a hlawhtlinzia kan hmu. Ruihhlo ngaite diriam loin, an tana ṭha tur, ruihlo ngaite chhan chhuak turin kan puanven i sâwi chhíng ang u," a ti.

Fimkhur tak leh dik taka ruihhlo dopuiah YMA member-te sáwmin R Lalngheta chuan, "Dan chunga lêng kan ni lo tih hre thar ila, dik tak leh huaitakin ruihhlo i do ang u. Ruihhlo kan do hi kan thawk thlawn lo, a la ti ve lote'n an tih loh nan inzirtirna tam zawk kan neih a ngai," a ti a; ruihhlo zuar ṭhinte chu an ruihhlo zawrh bansan a, eizawnna dang dap turin a chah.

YMA kumpuan hawn inkhawm hi CYMA vice president Prof Lalnuntluanga'n a kaihruai a; Operation Kingdom Ministry dintu Lalruatpuii leh ṬBCC dintu TT Zohmingthanga te hnenah chawimawina hlan a ni.