KHAWTHLIR

Ni 100 inhlawhna vbc 166.4 dawng

Rural Development & Administration department chuan, ni 100 inhlawhna (MGNREGS) hnuaia inhlawhna tur sum December 2, 2025 khan sorkar laipuiin vbc 166.4 a rawn pek thu an tarlang a, "Sumte hi Mizoram sorkar paltlang loa mipui (job card holder) bank account-a direct-a lut tur a nih avangin a tahtawl tê têin a lut mek a, rei lo têah mipui hnen thleng tura beisei a ni," an ti.

2nd IR silver jubilee

Khawzawla 2nd India Reserve (IR) Police chuan nimin khan Khawzawla an headquarters-ah silver jubilee an lawm a, director-general of police (DGP) Sharad Agarwal-a'n hmanpuiin, jubilee lungphun a hawng. Sharad Agarwal chuan, 2nd IR police-te inpekna leh taimakna vangin Khawzawl, Champhai leh Saitual district mipuite thlamuang taka an awm thu a sawi.

AMC-in ṭanpui

Aizawl mayor Lalrinenga Sailo hoin nimin khan Aizawl Municipal Corporation hotute'n Aizawla home/centre hrang hrang an tlawh a, Krismas thilpek atan Rs 50,000 ṭheuh an hlan. Thilpek an hlante chu - Operation Kingdom Ministry, Cancer Khualbuk, Special Blind School, Hermon Children's Home leh Agape Moral Reformation Organization te a ni.

Khâmah tla hlum

Nimin zing dar 2:20 vel khan K Lalchhandami (21), Zemabawk North chu Chaltlang Lily Veng huam chhunga Sairang lam panna NH kawngpui khâmah a tla hlum. Thu dawn danin, khâmah K Lalchhandami a tla tih hriat a nih veleh Bawngkawn police-te leh Disaster Quick Response Team ten an zawng a; khâmah uai thlain, metre 90 vela hlaah thiin an hmu a, zing dar 5:25-ah an la chhuak. Damdawi-ina a ruang endik a nih hnuah nimin vek khan vui a ni.