Sial vulhtute chhawmdawlna hawng

Champhai District AH&Vety officer Dr B Zonghinga chuan nimin khan Farkawn leh Samthang khuaa sial vulhtute a tlawh a; Fostering Climate Resilient Upland Farming System in the Northeast (FOCUS) project kaltlanga AH&Vety department hmalakna hrang hrangte hman theih turin a hawng.

Sorkar thuchhuah tarlan danin, Champhai district (Khawzawl district pian hma) huam chhunga khaw 20-ah sial vulh an awm a, chu'ng zinga khaw 10 chu thlan hmasakah neiin, FOCUS project kaltlangin sial vulh ṭanpuina pek a ni.

FOCUS project hnuaiah hian first instalment kaltlangin sial chaw hmun siam leh se in sak a ni a; sial vengtute chawlhna, tui inna tur water trough square ft. 1,269 pali zel leh enkawl an ngaih huna se thlunna tur travis siam a ni. Second instalment aṭangin ṭul leh mamawh angahte hmalak chhunzawm a ni ang.

First instalment kaltlang hian Farkawn leh Samthang khuaa sial vulh pawlte chu ṭanpuina Rs. 4,50,000 ve ve pek a ni a; second instalment-ah Rs. 4,50,000 pek leh tum a ni.

Farkawn Ranpui Vulh Association-ah chhungkua 30 an awm a, sial 280 vel chu Lurh tlanga Mithun Grazing Ground, sq.km. 100-a zauah an vulh. Samthang Zopui Se Vulh Association-ah chuan chhungkaw 51 an awm a, sial 300 chuang vulhin, an khaw rama hmun hrang hrang sq.km. 200 vela zauah an dah a ni.

FOCUS first instalment kaltlanga Sazêp, Khuangleng leh Hnahlan khuaa hmalaknate pawh zawh a ni tawh a; Vangchhia, Lianpui, Kàwlbêm leh Vàngtlang khuaahte hna thawh mek a ni bawk.