Kalphung thar sorkar hi mi taimate dinchhuahna tur a ni dawn - Sawivunga

Léng khua chuan nimin khan Saihnuna Hall-ah Leng Zirna Centenary (1925-2025) an lawm a, minister C Lalsawivunga'n a hmanpui. Minister chuan, kalphung thar sorkar chu mi taimate dinchhuahna tur sorkar a nih dawn thu a sawi.

Leng Zirna Centenary lawmna hi VC president Zairemmawia'n a kaihruai a, Art & Culture Minister-in centenary lungphun a hawn bakah, souvenir a tlangzarh a; tlaiah centenary ruai ṭheh a ni.

C Lalsawivunga chuan, sorkarin mipui tan zirna leh kawngpui ṭha, tui leh kawlphethaa intodelh, hriselna lama inenkawlna ṭha zawk leh hmasawnna ro tling pek a tum thu a sawi a, "Kalphung thar sorkar hi mi taima tan dinchhuahna tur sorkar a ni dawn. Mi taima tan ZPM sorkar hi dinchhuahna tham a ni dawn a, inthlan hmaa kan intiam ang kan tihlawhtling zel dawn a, mipui hian an thawhrim rah ZPM sorkar hnuaiah an tél zel dawn a ni," a ti.

ZPM intiam angin sawhthing, hmunphiah leh a dangte an lei tih sawiin Lalsawivunga chuan, "Kum tharah pawh sawhthing kan lei leh dawn a, hmarcha leh hmunphiah bakah thil dang pawh kut hnathawktute thar lei zel kan tum," a ti a; agriculture lam chu thingtlang mipui hmasawnna tur a nih avangin an ngaih pawimawh ber pakhat a nih thu a sawi.

C Lalsawivunga chuan, Horticulture department hnuaiah thei leh thlai pilot project kalpui mek a nih thu sawiin, "Mi 3,700 chuangin hma an la mek. Ranvulh lamah ram pawn aṭanga lak luh tihtlem tial tial a, kan intodelh chhoh dan turah kan hotute'n nasa takin ngaihtuahna an sêng," a ti. ZPM sorkarin Bána Kaih policy a duan te, Mizoram Universal Health Care Scheme leh department hrang hranga hmasawnna tur ruahmannate chu chhawr ṭangkaitu ni turin Léng mipui a chah bawk.