Minister-in Chawnpui Sports Centre hawng

Urban Development & Poverty Alleviation (UDPA) minister K Sapdanga chuan nimin khan UDPA department hmalaknaa sak Chawnpui Sports Centre a hawng.

Chawnpui Sports Centre hi Special Assistance to States for Capital Investment (SASCI) aṭanga hmuh cheng nuai 300 leh Mizoram sorkar aṭanga hmuh cheng nuai 83.37 hmanga sak a ni a; contractor Zothan Consultancy Services-in May 2023-ah sa ṭanin, October 2025-ah sak zawh a ni. Sports Centre building hi chhawng ruk a ni a, lirthei LMV 40 leh two wheeler 35 vel dahna, badminton court leh thil dangte a awm.

K Sapdanga chuan, Chawnpui Sports Centre sak chungchangah bialtu MLA TBC Lalvenchhunga, Chawnpui khawtlang hruaitu te, contractor te, Sports Minister leh sorkar hmasaa hotute hmalakna fakawm a tih thu a sawi a, "Tunlaiah sorkar hnaa luh a harsa tawh a, chutih rualin, sport lamah ṭhalaite tan eizawnna kawng zau zawk a inhawng mek. Sports infrastracture ṭha tak tak kan nei tawh a, sorkarin theihtawp chhuahin hma a la mek a ni," a ti.

Naupangte'n mumal taka infiamna lam an zir theih nan Empowering Mizoram Sports kalpui ṭan a nih thu sawiin Minister chuan, "Nu leh pate pawhin sports lama tui an fate ṭhahnemngaihpui nachang hria se ka duh," a ti a; Chawnpui Sports Centre aṭangin Mizoram tihmingṭhatu ṭhalai eng emaw zat chhuak se a duh thu a sawi.

Sports Centre hawnna inkhawm hi UDPA secretary Lalmalsawma Pachuau-in a kaihruai a; UDPA department hotu te, Chawnpui Local Council, YMA, MHIP leh MUP member-te an tel a ni.