Kolasib-ah IPRO leh MJA-ten hun hmangho

Nimin khan Kolasib-a Information & Public Relations officer (IPRO) Hmingthanzuala leh Kolasib district MJA member-te chuan IPR pisaah kum thar atana inhlan tharna hun an hmang a; IPRO-in MJA member-te hnenah 'Documentation on Covid-19 Vol-1' a hlàn nghal.

Hmingthanzuala chuan, Kolasib district MJA-te chu Covid-19 hri léng dona kawngah frontline worker pawimawh tak an nih thu sawiin, "Sorkar leh mipui tana in inpekna a lawmawm tak zet a, a ṭul apianga sorkar hmalakna tichak zawnga thawk zel turin ka sawm che u a ni," a ti.

IPRO chuan, hripui léng vanga eizawnna hrang hrang dapna kawngah harsatna a thlen mek laiin thuthar thehdarh kawnga eizawngte pawhin harsatna an hmachhawn thu sawiin, "Hetiang karah hian electronic media kaltlanga journalist hna kalpui nacháng hria pawh an pung mek a ni," a ti a; electronic media lamah ṭang zel turin a chah.

Kolasib MJA vice president Andrew VL Auva chuan, Kolasib-a MJA leh IPR department inkara thawhhona leh inpawhna ṭha tak a awm ṭhin chu lawmawm a tih thu a sawi a; National Press Day chu Kolasib-ah hman ve ṭhin ni se a duh thu a sawi bawk.

MJA, Kolasib district-ah hian member 15 an awm mek a, chu'ng zinga mi 12 chu accredited journalist an ni.