Sorkarin ṭhalaite hmasawnna tur atan theihtawp a chhuah - LESDE Minister

November 8-12, 2025 chhunga neih State Level Skill Competition chu nimin khan Labour, Employment, Skill Development & Entrepreneurship (LESDE) auditorium-ah khâr a ni a; kharna inkhawma khuallian LESDE minister Lalnghinglova Hmar chuan, sorkarin ṭhalaite hmasawnna atan theihtawp a chhuah thu a sawi.

Lalnghinglova Hmar chuan, Skill Competition chu ṭhalaite an thiamnate hmanga an intihsiakna hlawkthlak tak a nih thu sawiin, eizawnna tling thiamna neih ngei tum turin ṭhalai kal khawmte a chah a, "Mi 1,048 lai mai an tel hian intihsiakna hlawhtlinzia a tarlang. Thiamna eng pawh, tunlai khawvel mila digitise theih zel a nih a pawimawh," a ti.

Ṭhalaite hmasawnna chu ram leh hnam ṭhanna a nih thu sawiin Lalnghinglova chuan, "Sorkar chu ṭhalaite hmasawnna atan theihtawp chhuahin a pên zel dawn. Ministry of External Affairs pawhin LESDE hnuaia Mizoram Council for Vocational Training chu ram danga hna thawk tura ṭhalaite hmalakpuitu atan a pawm tawh," a ti a; kal khawmte chu an thiamnate tipung zel turin a fuih.

State level Skill Competition-a telte hi district level Skill Competition, November 18-20, 2025 chhunga neiha ti ṭha zual thlante an ni a; bakery, beauty therapy, cabinet making, carpentry leh car painting-a ti ṭha zualte hnenah lawmman hlan a ni.

State level-a ti ṭha zualte hi regional level, Guwahati-a neih turah an tel ang a; regional level-a an tih ṭhat dan azirin national level leh international level-a intihsiakna thlengin an kal thei dawn a ni.