Halpuah khapna bill pu lut dawn

December 11, Ningani khan Home minister K Sapdanga hoin a pisaah hâlpuah, hâlmawi leh a kaihhnawih thil dangte khapna thupek (prohibitory order) leh 'The Mizoram Firecrackers (Regulation & Control) Bill, 2025' chungchang sawiho a ni a, Bill hi Assembly session neih leh hunah put luh turin an rêl.

Ṭhutkhawmah hian, The Mizoram Firecrackers (Regulation & Control) Bill, 2025 chu kumina hmang nghal tur chuan hun a teptêr tawhah an ngai a; nakkuma Assembly budget session-ah regular bill anga put luh ṭha zawka hriat a nih avangin, chutianga hmalak tur chuan an rel a ni.

Kumin hi halpuah leh halmawi halin mihring leh ran laka nghawng ṭha lo a nei theihzia inzirtir uar kum, 'Year of Awareness Campaign on the Harmful Effects of Firecrackers' tan hman ni se, kum dang zawng aiin awareness campaign uar ni se, an ti.

Kum danga tih tawh ṭhin angin, Central YMA kaltlangin YMA member tinte hnenah, kohhran tin kaltlangin an kohhran mi leh sate hnenah, central para military force, central police organization hrang hrangte hnenah, Mizoram Merchant Association (MIMA) leh online marketing agency-te hnenah leh GAD kaltlangin sorkar hnathawkte hnenah khapna thupek zawm theuh tura ngenna siam leh ni se, an ti bawk.

Hâlpuah, hâlmawi leh puak thei thil lak luh, zawrh, lei leh hâl khapna thupekte ṭha taka mipuiin an zawm theih nan CYMA, local council, magistrate leh police-te thawk dun leh se, an ti.