KHAWTHLIR

Thisen pe

Nimin khan Civil Hospital, Aizawl tan Pachhunga University College NSS-in thisen unit 88 an pe a, petute mipa 67 leh hmeichhia 21 an ni. Republic Higher Secondary School NSS-in Krismas pualin unit 29 an pe a, petute mipa 16 leh hmeichhia 13 an ni a; mahnia a thlawna pe mi 13 an awm bawk. Serchhip HSS NSS volunteer mipa 14 leh hmeichhia pathum ten Serchhip District Hospital tan thisen unit 17 an pe a; Lunglei Nursing School pawhin Lunglei Civil Hospital tan unit 12 an pe a, petute hmeichhia 11 leh mipa pakhat an ni.

Kerala dinhmun zir

Mizoram Legislative Assembly-a Committee on Petitions member-te chuan an chairman T Lalhlimpuia hoin nimin khan Kerala Assembly Committee on Petitions member-te Kerala-ah an kâwm a, Committee hnathawh dan leh kalphungte an zir. Kerala tlawhnaah hian T Lalhlimpuia bakah, member H Lalzirliana leh Prova Chakma te an tel a ni.

BJP pisa khâr

BJP, Mizoram Pradesh chuan nimin khan Aizawla an pisaah Advance Christmas an hmang a, kum 2025 atan an party pisa an khâr nghal. BJP vice president Vanupa Zathang chuan, an party mite chu BJP-a an awm chhanah chiang tur leh Pathian hre reng tura chahin, Krismas leh kum thar hlim taka hmang turin duhsakna a hlan. BJP pisa hi January 12, 2026-ah hawn leh a ni ang.

Sorkar chhuang

ZPM Upa Committee member-te December 11, Ningania inhmukhawm chuan resolution siamin, "Pu Lalduhoma, chief minister kaihhruai sorkar chuan kum hnih a lo tling ta a, hemi hun chhunga hmalakna leh a hlawhtlinna Mizoramin kan hmuhte hi lawmawm kan ti a, kan chhuang hle a ni," an ti. Lalduhoma kaihhruai sorkar hmachhawp tihhlawhtlinna turah theihtawpa ṭawiawm zel an tum thu an tarlang bawk.