Science thiamna hmanga lo neih dan thar kalpui a ṭul - Lalduhoma

December 11, Ningani khan ICAR Research Complex for NEH Region, Mizoram Centre, Kolasib chuan ni hnih awh tur Tribal Sub Plan (TSP) hnuaia 'Krishi Mela cum State Farmers Workshop' an buatsaih a; khuallian chief minister Lalduhoma chuan, science thiamna hmanga lo neih dan thar kalpui a ṭul thu a sawi.

CM Lalduhoma chuan, Mizoramah hun rei tak chhung lo neih dan phung pangngai (jhum cultivation) hman a ni tawh a, tlo zawk leh science thiamna hmanga lo neih dan thar kalpui a ṭul thu sawiin, "Lo neih hi Mizo hnam nunah thûk takin bet mah se, leilung chereu zel leh sik leh sa inthlak danglam avang leh kan hmakhua a ngelngheh zawk nan technology changkang zawk hman a ṭul tawh a ni," a ti.

Bana Kaih (Handholding) scheme chungchang sawiin Lalduhoma chuan, "Eizawnna bul ṭan thar tumte hnenah loan hmangin ṭanpuina a pe a, loneih leh sumdawnna bul lo ṭan tawhte tan CM special package siam a ni. Aieng, hmarhcha, sawhthing, hmunphiah leh buh thar chhuahte hralhna man ṭha tak (price support) sorkarin a ngaihtuah," a ti a; sawhthing thartute ṭanpui nan cheng vbc 137 chuang sen a nih tawh thu a sawi.

Chief Minister chuan, eizawnna tling thlai (cash crop) lamah pawh nasa taka hmalak a nih thu sawiin, "A bik takin CM’s Rubber Mission hnuaiah hmalak a ni. Kumin financial year chhung hian rubber ṭiak nuai 11.58 chuang, hectare 2,575-a zauah phun tum a ni a, hmathlir thui zawkah hectare 11,000-a zaua phun tum a ni. Kuhva lamah pawh dan loa lak luh khauh taka ven a nih avangin a hralhna man a sang hle," a ti.

Khualzahawm Lalfamkima, Assembly deputy speaker pawhin thu sawiin, "Kut hnathawktute'n an thiamna leh hmanruate kan leilung mil tura an duan chhuahte chu thiam taka kan chhawr ṭangkai a ṭul," a ti a; khawvel ṭhang zelah lo hâla buh tuh mai duhtawk lo a, ICAR kutchhuak khawl leh thiamnate hmang ṭangkai turin kut hnathawktute a chah.

Krishi Mela cum State Farmers Workshop hawnnaah hian Kolasib, Mamit leh Hailakandi district aṭangin loneitu 300 chuang an tel. Loneitu hlawhtlingte hnenah lei lehna khawl (power tiller), kea rah aieng zai sawmna (pedal-operated turmeric slicer), hmarcha leh thil ro râwt sawmna (spice pulverizer), pa (mushroom) chi khawrna leh sawngbawlna (straw spawn filling and compaction unit) bakah, ar note leh vawk note sem a ni.