Minister-in W Phaileng centenary a hmanpui

Nimin khan West Phaileng chuan an khaw khelmualah an khaw kum 100 (centenary) tlin an lawm a, minister K Sapdanga'n a hmanpui.

K Sapdanga chuan, West Phaileng chu a tan chuan khaw hlu tak a nih thu sawiin, "Ka puzawnte khua a nih piah lamah, ṭhian tam tak ka neihna hmun, min duhsaktu tam tak awmna a ni. West Phaileng hian kum 100 hi kan lawm satliah a ni lo. Kum 100 kal ta chhung khan kan nu leh pa leh kan pi leh pu ten vawiin kan thlen theihna tur hian rim takin an tha leh tui an ngaihtuahna an seng a, ṭhangtharte tana rahbi min lo tuksak hi a hlu a ni," a ti.

Pi leh pute zah an phuzia ngaihtuah chung a, an sûlhnu tuai hnûm a ṭul thu sawiin Sapdanga chuan, "West Phailengin kum 100 kan tlin hian a lawmna ruai kan ṭhehah hian tawp mai lo ila, kut hnathawha hmingthanna ram pum huapa nei turin i inbuatsaih ang u," a ti a; ram pumah mipuiin West Phaileng a ṭha lama an hriat lâr dan tur ngaihtuah turin mipui a chah.

Home Minister chuan, ZPM sorkarin thil maksak tak tak kum hnih chhungin an ruahman tih sawiin, "Kut hnathawktute tan hamṭhatna kawng tam takah a inhawng mek a, sorkar inhawnna zar zo turin i inhmakhua ang u. Sorkarin health care scheme a buatsaihte hi a hlu hle a ni," a ti a; tunah chuan thingtlang kilkhawr bera mi pawh phai damdawi-inah an kal ve theih tawh thu a sawi.

West Phaileng centenary lawmna hi Organising Committee vice chairman Lalhmunsanga'n a kaihruai a; centenary zaipawl, malzai leh hnam lâmte ngaihthlak tur leh en tur a awm a ni.