Secondary School Games vawi 42-na khâr

Mizoram Secondary School Games vawi 42-na chu nimin khan Mizo High School tualah khâr a ni a, School Education joint director R Lalnunthari'n a hmanpui. Secondary School Games-ah hian Aizawl district (North) pakhatna an ni.

Kumin Secondary School Games-ah hian Aizawl district hi North leh South-ah ṭhen a ni a, district dang 10 nen an vaiin district 12 aṭangin zirlaite an intihsiak. Aizawl khawpui chhung aṭangin zirtirtu leh zirlai 181 an tel a, khawpui pawn aṭangin zirlai leh zirtirtu 796, an vaiin zirtirtu leh zirlai 977 an tel.

Ni li awh Games-ah hian infiamna (sports discipline) chi ruk - athletics, football, volleyball, taekwondo, inkawibah, inhruipawh leh kalchhet hmangin zirlaite an inel. A pumpuia pakhatna Aizawl District (North)-in gold medal pali, silver medal pathum leh bronze medal pakhat an la a; pahnihna Synod HSS-in gold pathum, silver panga leh bronze pahnih lain, pathumna GM HSS Champhai-in gold pathum, silver pahnih leh bronze pali an la a ni.

R Lalnunthari chuan, infiamna chu zirnain a ken tel a ni a, a pawimawh thu sawiin, "Zirna leh infiamna hi ṭhen hran theih loh, inchawih tâwka kalpui a ṭul avangin sikul naupangte'n rilru leh taksa hrisel an neih theih nan hunbi neiin infiamna hun neih a ṭul," a ti a; infiamna aṭangin zirlaite'n a huhoa thawh dan an thiam phah dawn thu a sawi.