CM leh MSCPCR hotute inkâwm

Chief minister Lalduhoma chuan nimin khan a pisaah Mizoram State Commission for Protection of Child Rights (MSCPCR) hotute a kâwm a, naupangte dikna chanvo (rights) humhalh theihna tura hmalak dan turte an sawiho.

Tarlan danin, MSCPCR hmalaknain School Education department-ah routine school inspection neih ṭhin a ni a, Safety of School research-a hmuh chhuahte aṭangin recommendation siam a ni. Kum 2023 khan Aizawl District Court-ah Child Welfare Officer Room leh Children’s Room siam a ni a, naupang 814-in hmang ṭangkai tawh a, chung zinga 113 chu POCSO case vanga court-a kal an ni.

CM Lalduhoma chuan, Mizorama POCSO case pung zel chu pawi a tih thu a sawi a; naupangte laka pawi khawihtute chungthu rang taka rel fel leh naupangte dikna leh chanvo humhalhna dante ṭha taka kenkawh chu a ngaih pawimawh thu a sawi.